ਨਵੀਂ ਦਿੱਲੀ, 25 ਅਪ੍ਰੈਲ 2026 (ਦੀ ਪੰਜਾਬ ਵਾਇਰ)। AAP ਛੱਡ ਕੇ ਭਾਜਪਾ ਵਿੱਚ ਸ਼ਾਮਲ ਹੋਣ ਦੇ ਮਹਿਜ਼ 24 ਘੰਟਿਆਂ ਦੇ ਅੰਦਰ ਰਾਜ ਸਭਾ ਮੈਂਬਰ ਰਾਘਵ ਚੱਢਾ ਦੇ ਇੰਸਟਾਗ੍ਰਾਮ ਉੱਤੇ ਕਰੀਬ 10 ਲੱਖ ਫ਼ੌਲੋਅਰ ਘੱਟ ਗਏ। ਸ਼ੁੱਕਰਵਾਰ ਨੂੰ ਜਿੱਥੇ ਉਨ੍ਹਾਂ ਦੇ 1 ਕਰੋੜ 46 ਲੱਖ ਫ਼ੌਲੋਅਰ ਸਨ, ਉੱਥੇ ਸ਼ਨੀਵਾਰ ਦੁਪਹਿਰ ਇੱਕ ਵਜੇ ਤੱਕ ਇਹ ਗਿਣਤੀ ਘਟ ਕੇ 1 ਕਰੋੜ 35 ਲੱਖ ਰਹਿ ਗਈ।
ਸੋਸ਼ਲ ਮੀਡੀਆ ਉੱਤੇ #unfollowRaghavChadha ਦਾ ਟ੍ਰੈਂਡ ਤੇਜ਼ੀ ਨਾਲ ਫੈਲ ਰਿਹਾ ਹੈ। ਰਾਜਨੀਤਕ ਟਿੱਪਣੀਕਾਰਾਂ ਦਾ ਕਹਿਣਾ ਹੈ ਕਿ ਇਸ ਮੁਹਿੰਮ ਦੀ ਅਗਵਾਈ ਮੁੱਖ ਰੂਪ ਵਿੱਚ Gen Z ਯਾਨੀ ਨੌਜਵਾਨ ਵਰਗ ਕਰ ਰਿਹਾ ਹੈ।
NCP (SP) ਦੇ ਬੁਲਾਰੇ ਅਨੀਸ਼ ਗਾਵਾਂਡੇ ਨੇ ਟਵੀਟ ਕੀਤਾ ਕਿ ਇੰਟਰਨੈੱਟ ਰਾਤੋ-ਰਾਤ ਕਿਸੇ ਨੂੰ ਹੀਰੋ ਬਣਾ ਸਕਦਾ ਹੈ ਅਤੇ ਰਾਤੋ-ਰਾਤ ਜ਼ੀਰੋ ਵੀ ਕਰ ਸਕਦਾ ਹੈ।
ਨੌਜਵਾਨਾਂ ਦਾ ਚਹੇਤਾ ਸੀ ਚੱਢਾ
ਰਾਘਵ ਚੱਢਾ ਨੇ ਰਾਜ ਸਭਾ ਵਿੱਚ ਉਹ ਮੁੱਦੇ ਉਠਾ ਕੇ ਨੌਜਵਾਨਾਂ ਵਿੱਚ ਆਪਣੀ ਵੱਖਰੀ ਥਾਂ ਬਣਾਈ ਸੀ ਜਿਨ੍ਹਾਂ ਨੂੰ ਆਮ ਤੌਰ ‘ਤੇ ਸਿਆਸਤ ਵਿੱਚ ਅਣਡਿੱਠ ਕੀਤਾ ਜਾਂਦਾ ਹੈ — ਪੇਟਰਨਿਟੀ ਲੀਵ, ਟ੍ਰੈਫਿਕ ਸੰਕਟ, ਟੈਲੀਕਾਮ ਕੰਪਨੀਆਂ ਵੱਲੋਂ ਡੇਟਾ ਸੀਮਾ, ਹਵਾਈ ਅੱਡਿਆਂ ‘ਤੇ ਮਹਿੰਗੇ ਸਮੋਸੇ ਅਤੇ ਗਿੱਗ ਵਰਕਰਾਂ ਦੀ ਸ਼ੋਸ਼ਣ ਸਮੱਸਿਆ। ਉਨ੍ਹਾਂ ਨੇ ਗਿੱਗ ਵਰਕਰਾਂ ਦੀਆਂ ਮੁਸ਼ਕਲਾਂ ਸਮਝਣ ਲਈ ਇੱਕ ਦਿਨ Blinkit ਡਿਲਿਵਰੀ ਪਾਰਟਨਰ ਵਜੋਂ ਵੀ ਕੰਮ ਕੀਤਾ। ਉਨ੍ਹਾਂ ਦੇ ਯਤਨਾਂ ਸਦਕਾ ਕੇਂਦਰ ਸਰਕਾਰ ਨੇ ਡਿਲਿਵਰੀ ਕੰਪਨੀਆਂ ਤੋਂ ਲਾਜ਼ਮੀ 10 ਮਿੰਟ ਡਿਲਿਵਰੀ ਦੀ ਸ਼ਰਤ ਹਟਾਉਣ ਦੇ ਹੁਕਮ ਵੀ ਦਿੱਤੇ ਸਨ।
ਪੁਰਾਣੀਆਂ ਪੋਸਟਾਂ ਮਿਟਾਉਣ ਦੇ ਦੋਸ਼
ਸੀਨੀਅਰ AAP ਆਗੂ ਸੌਰਭ ਭਾਰਦਵਾਜ ਨੇ ਦੋਸ਼ ਲਗਾਇਆ ਕਿ ਚੱਢਾ ਨੇ ਆਪਣੇ ਸੋਸ਼ਲ ਮੀਡੀਆ ਹੈਂਡਲਾਂ ਤੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਭਾਜਪਾ ਦੀ ਆਲੋਚਨਾ ਕਰਨ ਵਾਲੀਆਂ ਪੁਰਾਣੀਆਂ ਪੋਸਟਾਂ ਮਿਟਾ ਦਿੱਤੀਆਂ ਹਨ। ਉਨ੍ਹਾਂ ਕਿਹਾ ਕਿ ਹੁਣ ਚੱਢਾ ਦੀ ਟਾਈਮਲਾਈਨ ‘ਤੇ ਮੋਦੀ ਦਾ ਜ਼ਿਕਰ ਕਰਨ ਵਾਲੀਆਂ ਸਿਰਫ਼ ਦੋ ਪੋਸਟਾਂ ਬਚੀਆਂ ਹਨ — ਦੋਵੇਂ ਪ੍ਰਧਾਨ ਮੰਤਰੀ ਦੀ ਤਾਰੀਫ਼ ਵਿੱਚ।
ਚੱਢਾ ਨੇ ਆਪਣੇ ਨਾਲ AAP ਦੇ ਛੇ ਰਾਜ ਸਭਾ ਮੈਂਬਰ ਵੀ ਭਾਜਪਾ ਵਿੱਚ ਲੈ ਜਾਂਦੇ, ਜਿਸ ਨਾਲ ਕੇਜਰੀਵਾਲ ਦੀ ਪਾਰਟੀ ਲਈ ਅੰਦਰੂਨੀ ਚੁਣੌਤੀ ਹੋਰ ਡੂੰਘੀ ਹੋ ਗਈ ਹੈ।
ਹੁਣ ਸਭ ਦੀ ਨਜ਼ਰ ਇਸ ਗੱਲ ‘ਤੇ ਹੋਵੇਗੀ ਕਿ ਅੰਕੜਿਆਂ ਦੀ ਭਾਸ਼ਾ ਸਮਝਣ ਵਾਲਾ ਇਹ ਸਿਆਸਤਦਾਨ ਆਪਣੇ ਹੀ ਡਿੱਗਦੇ ਅੰਕੜਿਆਂ ਦਾ ਜਵਾਬ ਕਿਵੇਂ ਦਿੰਦਾ ਹੈ।
