ਟਾਲ ਗਏ ਹਰੀਸ਼ ਚੋਧਰੀ ਵੱਲੋਂ ਭੇਜੇ ਗਏ ਨੋਟਿਸ ਦਾ ਸਵਾਲ
ਅਮ੍ਰਿਤਸਰ, 3 ਮਈ । ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਮੰਗਲਵਾਰ ਨੂੰ ਅੰਮ੍ਰਿਤਸਰ ‘ਚ ਰੇਤ ਦੇ ਮੁੱਦੇ ‘ਤੇ ਆਮ ਆਦਮੀ ਪਾਰਟੀ ਸਰਕਾਰ ਨੂੰ ਘੇਰਿਆ। ਉਨ੍ਹਾਂ ਕਿਹਾ ਕਿ ਮਾਈਨਿੰਗ ਨੂੰ ਰੋਕਣਾ ਇਸ ਦਾ ਹੱਲ ਨਹੀਂ ਹੈ, ਸਗੋਂ ਠੇਕੇਦਾਰੀ ਸਿਸਟਮ ਨੂੰ ਖਤਮ ਕਰ ਕੇ ਹੀ ਸਰਕਾਰ ਨੂੰ ਪੈਸਾ ਪਹੁੰਚਾਇਆ ਜਾ ਸਕਦਾ ਹੈ। ਪ੍ਰੈਸ ਨਾਲ ਗੱਲਬਾਤ ਕਰ ਸਿੱਧੂ ਨੇ ਅਰਵਿੰਦ ਕੇਜਰੀਵਾਲ ਵੱਲੋਂ ਰੇਤ ਖਣਨ ਤੋਂ 20 ਹਜ਼ਾਰ ਕਰੋੜ ਦੇ ਕੀਤੇ ਗਏ ਦਾਅਵੇ ‘ਤੇ ਵੀ ਤੰਜ ਕੱਸਿਆ।
ਸਿੱਧੂ ਨੇ ਕੇਜਵੀਵਾਲ ਦੇ ਦਾਅਵੇਆਂ ਨੂੰ ਝੂਠ ਦਾ ਪੁਲੰਦਾ ਦੱਸਦੇ ਹੋਏ ਕਿਹਾ ਕਿ ਨਾ ਤਾਂ ਅਕਾਲੀ ਸਰਕਾਰ ਅਤੇ ਨਾ ਹੀ ਕਾਂਗਰਸ ਸਰਕਾਰ 200 ਕਰੋੜ ਤੋਂ ਵੱਧ ਕਮਾ ਸਕੀ। ਉਨ੍ਹਾਂ ਕਿਹਾ ਕਿ ਦੋ ਮਹੀਨੇ ਪਹਿਲਾਂ ਜਦੋਂ ਕਾਂਗਰਸ ਦੀ ਸਰਕਾਰ ਸੀ ਤਾਂ ਰੇਤਾ 900 ਰੁਪਏ ਸੀ, ਟਰਾਲੀ 3600 ‘ਚ ਮਿਲਦੀ ਸੀ। ਇਕ ਮਹੀਨੇ ਬਾਅਦ 22 ਸੌ ਰੁਪਏ ਯਾਨੀ 8800 ਰੁਪਏ ਦੀ ਟਰਾਲੀ ਹੋ ਗਈ। ਹੁਣ ਟਰਾਲੀ 16000 ਵਿੱਚ ਵਿਕ ਰਹੀ ਹੈ। ਸਿੱਧੂ ਨੇ ਕਿਹਾ ਕਿ ਉਸਾਰੀ ਰੁਕੀ ਹੋਈ ਹੈ ਅਤੇ ਬੇਰੁਜ਼ਗਾਰ ਮਜ਼ਦੂਰ ਸਰਕਾਰ ਵੱਲ ਝਾਕ ਰਹੇ ਹਨ। ਆਮ ਆਦਮੀ ਪਾਰਟੀ ਦੀ ਸਰਕਾਰ ਵੇਲੇ ਉਸਾਰੀ ਦਾ ਸਾਰਾ ਕਾਰੋਬਾਰ ਠੱਪ ਹੋ ਕੇ ਰਹਿ ਗਿਆ ਹੈ। ਤੁਸੀਂ ਆਮ ਆਦਮੀ ਪਾਰਟੀ ਦੀ ਗੱਲ ਕਰਦੇ ਹੋ ਪਰ ਕਿਸੇ ਖਾਸ ਵਿਅਕਤੀ ਲਈ ਰੇਤ ਚੁੱਕਣੀ ਵੀ ਔਖੀ ਹੋ ਗਈ ਹੈ। ਜਿਨ੍ਹਾਂ ਨੇ ਮਕਾਨ ਬਣਾਉਣ ਲਈ ਕਰਜ਼ਾ ਲਿਆ ਸੀ, ਉਹ ਵੀ ਸਰਕਾਰ ਦੀਆਂ ਨੀਤੀਆਂ ਤੋਂ ਪ੍ਰੇਸ਼ਾਨ ਹਨ।
ਸਿੱਧੂ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਦਾ ਕੋਈ ਵਕਾਰ ਨਹੀਂ ਹੈ। ਜਦੋਂ ਤੱਕ ਠੇਕੇਦਾਰੀ ਸਿਸਟਮ ਖਤਮ ਨਹੀਂ ਹੁੰਦਾ, 20 ਹਜ਼ਾਰ ਕਰੋੜ, ਫਿਰ ਤੁਸੀਂ ਮੈਨੂੰ 200 ਕਰੋੜ ਦਿਖਾਓ, ਫਿਰ ਮੈਂ ਮੰਨ ਜਾਵਾਂਗਾ। ਜਦੋਂ ਤੱਕ ਪੰਜਾਬ ਸਰਕਾਰ ਦੀ ਇਹ ਨੀਤੀ ਨਹੀਂ ਆਉਂਦੀ, ਪੰਜਾਬ ਬਰਬਾਦ ਹੁੰਦਾ ਰਹੇਗਾ। ਸਿੱਧੂ ਨੇ ਕਿਹਾ ਕਿ ਤੁਸੀਂ ਲੋਕਾਂ ਨੇ 7000 ਕਰੋੜ ਦਾ ਕਰਜ਼ਾ ਲਿਆ ਹੈ।
ਪੰਜਾਬ ਵਿੱਚ ਹਫੜਾ-ਦਫੜੀ ਮਚੀ ਹੋਈ ਹੈ ਕਿਉਂਕਿ ਸਭ ਤੋਂ ਖਤਰਨਾਕ ਮਨੁੱਖ ਭੁੱਖਾ ਹੈ। ਜਦੋਂ ਮਜ਼ਦੂਰ ਨੂੰ ਰੁਜ਼ਗਾਰ ਨਹੀਂ ਮਿਲੇਗਾ ਤਾਂ ਗਰੀਬ ਕੀ ਕਰੇਗਾ? ਤੁਸੀਂ ਲੋਕਾਂ ਨੇ ਪੰਜਾਬ ਵਿੱਚ ਝੂਠ ਵੇਚਿਆ ਹੈ, ਇਸ ਲਈ ਇਸ ਅਰਾਜਕਤਾ ਲਈ ਤੁਸੀਂ ਵੀ ਜ਼ਿੰਮੇਵਾਰ ਹੋ।
ਉਨ੍ਹਾਂ ਕਿਹਾ ਕਿ ਰੇਤੇ ਦਾ ਵਿਸ਼ੇ ਇੰਨਾ ਗੰਭੀਰ ਹੈ ਕਿ ਇਸ ਵਿਸ਼ੇ ਉਤੇ ਸਰਕਾਰਾਂ ਵੀ ਡਿੱਗ ਗਈਆਂ ਹਨ। ਇਕੱਲੇ ਮਾਈਨਿੰਗ ਨੂੰ ਰੋਕਣਾ ਇਸ ਦਾ ਹੱਲ ਨਹੀਂ ਹੈ। ਜਦੋਂ ਤੱਕ ਗਰੀਬਾਂ ਨੂੰ ਹਜ਼ਾਰ ਰੁਪਏ ਵਿੱਚ ਰੇਤ ਨਹੀਂ ਮਿਲੇਗੀ, ਉਦੋਂ ਤੱਕ ਮਜ਼ਦੂਰ ਨੂੰ ਰੁਜ਼ਗਾਰ ਨਹੀਂ ਮਿਲੇਗਾ। ਇਹ ਤੁਹਾਡੇ ਇਰਾਦੇ ਨੂੰ ਦਰਸਾਉਂਦਾ ਹੈ ਕਿ ਤੁਹਾਡੀ ਕੋਈ ਮਾਈਨਿੰਗ ਨੀਤੀ ਨਹੀਂ ਸੀ ਅਤੇ ਤੁਸੀਂ ਝੂਠ ਬੋਲਿਆ ਸੀ। ਜੇਕਰ ਕੋਈ ਨੀਤੀ ਹੁੰਦੀ ਤਾਂ ਇਹ ਪਹਿਲੇ ਦਿਨ ਤੋਂ ਲਾਗੂ ਹੋ ਜਾਂਦੀ। ਮੇਰਾ ਇਹ ਦੱਸਣ ਦਾ ਮਕਸਦ ਹੈ ਕਿ ਪੰਜਾਬ ਨੀਤੀਆਂ ਨਾਲ ਅੱਗੇ ਆਵੇਗਾ। ਪੰਜਾਬ ਉਦੋਂ ਤੱਕ ਅੱਗੇ ਨਹੀਂ ਵਧੇਗਾ ਜਦੋਂ ਤੱਕ ਇਸ ਦੀ ਪਹੁੰਚ ਨਹੀਂ ਕੀਤੀ ਜਾਂਦੀ ਅਤੇ ਬਜਟ ਵਿੱਚ ਇਸ ਦੀ ਵਿਵਸਥਾ ਨਹੀਂ ਕੀਤੀ ਜਾਂਦੀ ਅਤੇ ਖੋਜ ਨਹੀਂ ਕੀਤੀ ਜਾਂਦੀ।
ਉਨ੍ਹਾਂ ਕੇਜਰੀਵਾਲ ਨੂੰ ਘੇਰਦਿਆਂ ਕਿਹਾ ਕਿ ਹਿਮਾਚਲ ਦੀਆਂ ਠੰਢੀਆਂ ਹਵਾਵਾਂ ਵਿੱਚ ਪੰਜਾਬ ਦੀ ਗੱਲ ਉਨ੍ਹਾਂ ਤੱਕ ਨਹੀਂ ਪਹੁੰਚੇਗੀ। ਸਿੱਧੂ ਤੁਹਾਡੇ ਝੂਠ ਦਾ ਪਰਦਾ ਫਾਸ਼ ਕਰਦਾ ਰਹੇਗਾ। ਦੇਖੋ ਦੁਨੀਆਂ ਵਿੱਚ ਵੱਡੇ ਝੂਠੇ ਪਰ ਤੇਰੇ ਤੋਂ ਵੱਡਾ ਕੋਈ ਨਹੀਂ, ਤੂੰ ਤਾਂ ਸੁਖਬੀਰ ਗੱਪੀ ਨੂੰ ਵੀ ਪਾਰ ਕਰ ਲਿਆ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਲਾਅ ਐਂਡ ਆਰਡਰ ਨੂੰ ਛੱਡ ਕੇ ਹਰ ਮਸਲੇ ਦਾ ਹੱਲ ਆਮਦਨ ਦਾ ਸਾਧਨ ਹੈ। ਲੋਕਾਂ ਦੇ ਇਨ੍ਹਾਂ ਮੁੱਦਿਆਂ ‘ਤੇ ਪਹਿਰਾ ਦੇਣਾ ਮੇਰਾ ਫਰਜ਼ ਸੀ ਅਤੇ ਮੈਂ ਕਰਦਾ ਰਹਾਂਗਾ। ਸਿੱਧੂ ਨੇ ਹਰੀਸ਼ ਚੌਧਰੀ ਵੱਲੋਂ ਭੇਜੇ ਨੋਟਿਸ ਦਾ ਜਵਾਬ ਮੁੜ ਟਾਲ ਦਿੱਤਾ।
