ਲੇਖਕ: ਗੁਰਪ੍ਰਤਾਪ ਸਿੰਘ ਮਾਨ
ਪ੍ਰਗਟ ਸਿੰਘ ਹਾਕੀ ਦੇ ਮੈਦਾਨ ਵਿੱਚ ਭਾਰਤ ਦੀ ਕਪਤਾਨੀ ਕਰ ਚੁੱਕੇ ਹਨ। 2027 ਦੀਆਂ ਚੋਣਾਂ ਵੱਲ ਪੰਜਾਬ ਕਾਂਗਰਸ ਦੀ ਅਗਵਾਈ ਕਰਨਾ ਸ਼ਾਇਦ ਉਨ੍ਹਾਂ ਦਾ ਹੁਣ ਤੱਕ ਦਾ ਸਭ ਤੋਂ ਔਖਾ ਮੈਚ ਸਾਬਤ ਹੋਵੇ। ਉਨ੍ਹਾਂ ਦਾ ਸਾਫ਼-ਸੁਥਰਾ ਅਕਸ, ਖਿਡਾਰੀਆਂ ਵਾਲਾ ਅਨੁਸ਼ਾਸਨ ਅਤੇ ਸੰਜਮ ਭਰਿਆ ਸੁਭਾਅ ਇੱਕ ਚੰਗੀ ਸ਼ੁਰੂਆਤ ਦੀ ਆਸ ਬੰਨ੍ਹਾਉਂਦੇ ਹਨ। ਪਰ ਇਸ ਸਿਆਸੀ ਐਸਟ੍ਰੋਟਰਫ਼ ‘ਤੇ ਉਨ੍ਹਾਂ ਨੂੰ ਸਭ ਤੋਂ ਪਹਿਲਾਂ ਆਪਣੇ ਹੀ ਖਿਡਾਰੀਆਂ ਨੂੰ ਇੱਕ ਸਾਂਝੀ ਖੇਡ ਯੋਜਨਾ ‘ਤੇ ਤੁਰਨ ਲਈ ਮਨਾਉਣਾ ਪਵੇਗਾ।
ਸੀਨੀਅਰ ਆਗੂ, ਆਪੋ-ਆਪਣੀਆਂ ਅਭਿਲਾਸ਼ਾਵਾਂ
ਪ੍ਰਤਾਪ ਸਿੰਘ ਬਾਜਵਾ, ਰਾਣਾ ਗੁਰਜੀਤ ਸਿੰਘ, ਸੁਖਪਾਲ ਸਿੰਘ ਖਹਿਰਾ, ਸੁਖਜਿੰਦਰ ਸਿੰਘ ਰੰਧਾਵਾ ਅਤੇ ਚਰਨਜੀਤ ਸਿੰਘ ਚੰਨੀ ਵਰਗੇ ਕਈ ਆਗੂ ਪ੍ਰਗਟ ਸਿੰਘ ਨਾਲੋਂ ਕਿਤੇ ਵੱਧ ਸੀਨੀਅਰ ਹਨ। ਇਨ੍ਹਾਂ ਕੋਲ ਤਜਰਬਾ ਹੈ ਅਤੇ ਆਪੋ-ਆਪਣਾ ਸੁਤੰਤਰ ਆਧਾਰ ਵੀ ਹੈ। ਜਿਨ੍ਹਾਂ ਸੀਨੀਅਰ ਆਗੂਆਂ ਕਾਰਨ ਪ੍ਰਧਾਨ ਬਦਲਿਆ ਗਿਆ, ਉਹ ਹੁਣ ਵੱਧ ਪ੍ਰਭਾਵ ਦੀ ਆਸ ਰੱਖ ਸਕਦੇ ਹਨ। ਪ੍ਰਗਟ ਨੂੰ ਇਨ੍ਹਾਂ ਦੇ ਕੱਦ ਦਾ ਸਤਿਕਾਰ ਕਰਦਿਆਂ ਪ੍ਰਧਾਨ ਵਜੋਂ ਆਪਣਾ ਅਧਿਕਾਰ ਵੀ ਕਾਇਮ ਕਰਨਾ ਹੋਵੇਗਾ। ਸਿਆਸੀ ਆਗੂ ਅਕਸਰ ਰਲ ਕੇ ਸ਼ਿਕਾਰ ਕਰਨਾ ਅਤੇ ਲੁੱਟ ਦਾ ਮਾਲ ਵੰਡਣਾ ਪਸੰਦ ਕਰਦੇ ਹਨ, ਯਾਨੀ ਟਿਕਟਾਂ, ਪ੍ਰਭਾਵ ਅਤੇ ਅਹੁਦੇ। ਇਨ੍ਹਾਂ ਉਮੀਦਾਂ ਨੂੰ ਸੰਭਾਲਣਾ, ਜੋ ਕਦੇ ਜਾਇਜ਼ ਹੁੰਦੀਆਂ ਹਨ ਪਰ ਜ਼ਿਆਦਾਤਰ ਵਧਾ-ਚੜ੍ਹਾ ਕੇ ਪੇਸ਼ ਕੀਤੀਆਂ ਹੁੰਦੀਆਂ ਹਨ, ਸਖ਼ਤੀ ਅਤੇ ਰਣਨੀਤੀ ਦੀ ਮੰਗ ਕਰੇਗਾ। ਇਨ੍ਹਾਂ ਆਗੂਆਂ ਨੂੰ ਇੱਕ ਟੀਮ ਵਜੋਂ ਕੰਮ ਕਰਨ ਲਈ ਤਿਆਰ ਕਰਨਾ ਵੱਡੀ ਚੁਣੌਤੀ ਹੋਵੇਗੀ। ਇਨ੍ਹਾਂ ਵਿੱਚੋਂ ਬਹੁਤੇ ਆਗੂ ਇਹ ਦੇਖ ਕੇ ਖ਼ੁਸ਼ ਨਹੀਂ ਹਨ ਕਿ 2017 ਵਿੱਚ ਕਾਂਗਰਸ ਵਿੱਚ ਸ਼ਾਮਲ ਹੋਇਆ ਸਾਬਕਾ ਅਕਾਲੀ ਆਗੂ ਪ੍ਰਧਾਨ ਦੀ ਕੁਰਸੀ ਲੈ ਗਿਆ ਹੈ।
ਵੜਿੰਗ ਦਾ ਤਜਰਬਾ ਅਤੇ ਅਧਿਕਾਰ ਦੀ ਲੜਾਈ
ਰਾਜਾ ਵੜਿੰਗ ਦਾ ਕਿੱਸਾ ਇੱਕ ਤਜਰਬਾ ਵੀ ਹੈ ਅਤੇ ਚੇਤਾਵਨੀ ਵੀ। ਉਨ੍ਹਾਂ ਨੇ 2022 ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਹਾਰ ਮਗਰੋਂ ਰਾਹੁਲ ਗਾਂਧੀ ਵੱਲੋਂ ਸੌਂਪੀ ਜ਼ਿੰਮੇਵਾਰੀ ‘ਤੇ ਬਹੁਤ ਮਿਹਨਤ ਕੀਤੀ। ਉਨ੍ਹਾਂ ਦੇ ਪ੍ਰਧਾਨ ਹੁੰਦਿਆਂ ਕਾਂਗਰਸ ਨੇ 2024 ਵਿੱਚ ਪੰਜਾਬ ਅੰਦਰ ਸੱਤ ਲੋਕ ਸਭਾ ਸੀਟਾਂ ਜਿੱਤੀਆਂ। ਫਿਰ ਵੀ ਸੀਨੀਅਰ ਆਗੂਆਂ ਨੇ ਉਨ੍ਹਾਂ ਵਿਰੁੱਧ ਧੜੇਬੰਦੀ ਕੀਤੀ, ਪ੍ਰੋਗਰਾਮਾਂ ਦਾ ਬਾਈਕਾਟ ਕੀਤਾ ਅਤੇ ਇੱਕ ਤਰ੍ਹਾਂ ਨਾਲ ਉਨ੍ਹਾਂ ਦੇ ਕੰਮਕਾਜ ਦਾ ਗਲ਼ਾ ਘੁੱਟ ਦਿੱਤਾ। ਉਨ੍ਹਾਂ ਦੀਆਂ ਜੋ ਵੀ ਕਮੀਆਂ ਰਹੀਆਂ ਹੋਣ, ਪ੍ਰਧਾਨ ਨੂੰ ਕਮਜ਼ੋਰ ਕਰਨ ਨਾਲ ਜਥੇਬੰਦੀ ਕਮਜ਼ੋਰ ਹੋਈ।
ਪ੍ਰਗਟ ਨੂੰ ਵੜਿੰਗ ਵੱਲੋਂ ਨਿਯੁਕਤ ਮੌਜੂਦਾ ਕਾਰਜਕਾਰੀ ਪ੍ਰਧਾਨ, ਚੋਣ ਕਮੇਟੀਆਂ ਦੇ ਮੁਖੀ ਅਤੇ ਜ਼ਿਲ੍ਹਾ ਪ੍ਰਧਾਨ ਵਿਰਾਸਤ ਵਿੱਚ ਮਿਲੇ ਹਨ। ਪਹਿਲਾਂ ਉਨ੍ਹਾਂ ਨੂੰ ਚੰਨੀ ਧੜੇ ਦੇ ਨੇੜੇ ਸਮਝਿਆ ਜਾਂਦਾ ਸੀ। ਪਰ ਹੁਣ ਸੰਕੇਤ ਹਨ ਕਿ ਸਾਬਕਾ ਪ੍ਰਧਾਨ ਵੜਿੰਗ ਨੇ ਸਿੰਗਲਾ ਦੀ ਥਾਂ ਉਨ੍ਹਾਂ ਦਾ ਨਾਂ ਸਿਫ਼ਾਰਸ਼ ਕੀਤਾ ਸੀ, ਜੋ ਸਿਆਸੀ ਸਮੀਕਰਨ ਬਦਲ ਦਿੰਦਾ ਹੈ। ਸੀਨੀਅਰ ਆਗੂ ਆਪਣੇ ਸਮਰਥਕਾਂ ਲਈ ਟਿਕਟਾਂ ਦਾ ਜ਼ੋਰ ਪਾਉਣਗੇ। ਉਮੀਦਵਾਰਾਂ ਦੀ ਚੋਣ ਵਿੱਚ ਲੋਕ ਸੇਵਾ, ਇਮਾਨਦਾਰੀ, ਸੱਚਾਈ ਅਤੇ ਜਿੱਤਣ ਦੀ ਸਮਰੱਥਾ ਝਲਕਣੀ ਚਾਹੀਦੀ ਹੈ। ਟਿਕਟਾਂ ਦੀ ਅੰਤਿਮ ਸੂਚੀ ਦੱਸੇਗੀ ਕਿ ਪ੍ਰਗਟ ਟੀਮ ਦੀ ਅਗਵਾਈ ਕਰਦੇ ਹਨ ਜਾਂ ਸਿਰਫ਼ ਆਗੂਆਂ ਦੇ ਆਪੋ-ਆਪਣੇ “ਕੋਟਿਆਂ” ਦੀਆਂ ਮੰਗਾਂ ਨੂੰ ਪੂਰਾ ਕਰਦੇ ਹਨ।
ਮਾਲਵੇ ਦੀ ਨੁਮਾਇੰਦਗੀ
ਪੰਜਾਬ ਦੀਆਂ 117 ਵਿਧਾਨ ਸਭਾ ਸੀਟਾਂ ਵਿੱਚੋਂ 69 ਮਾਲਵੇ ਵਿੱਚ ਹੋਣ ਕਰਕੇ ਇਸ ਦਾ ਸਿਆਸੀ ਵਜ਼ਨ ਸਭ ਤੋਂ ਵੱਧ ਹੈ। ਇੱਥੇ ਇੱਕ ਵੱਡੀ ਚੁਣੌਤੀ ਹੈ। ਪ੍ਰਗਟ ਅਤੇ ਚੰਨੀ (ਜਲੰਧਰ ਤੋਂ ਸੰਸਦ ਮੈਂਬਰ ਅਤੇ ਚਮਕੌਰ ਸਾਹਿਬ ਦੇ ਪੁਆਧ ਇਲਾਕੇ ਵਜੋਂ) ਦੋਆਬੇ ਨਾਲ ਸਬੰਧਤ ਹਨ, ਜਦਕਿ ਬਾਜਵਾ ਅਤੇ ਰੰਧਾਵਾ ਮਾਝੇ ਦੀ ਨੁਮਾਇੰਦਗੀ ਕਰਦੇ ਹਨ।
ਇਸ ਜਥੇਬੰਦਕ ਢਾਂਚੇ ਵਿੱਚ ਮਾਲਵੇ ਦੀ ਨੁਮਾਇੰਦਗੀ ਵੱਡੇ ਪੱਧਰ ‘ਤੇ ਗ਼ੈਰਹਾਜ਼ਰ ਹੈ, ਜੋ ਚਿੰਤਾ ਦਾ ਵਿਸ਼ਾ ਹੋਵੇਗਾ ਅਤੇ ਜਿਸ ‘ਤੇ ਧਿਆਨ ਦੇਣ ਦੀ ਲੋੜ ਹੋਵੇਗੀ।
ਹਿੰਦੂ ਨੁਮਾਇੰਦਗੀ
ਹਿੰਦੂ ਨੁਮਾਇੰਦਗੀ ਵੱਲ ਵੀ ਧਿਆਨ ਦੇਣ ਦੀ ਲੋੜ ਹੈ। ਹਿੰਦੂ ਪੰਜਾਬ ਦੀ ਆਬਾਦੀ ਦਾ ਲਗਭਗ 39 ਫ਼ੀਸਦੀ ਹਿੱਸਾ ਹਨ। 2021 ਵਿੱਚ ਜਦੋਂ ਸੁਨੀਲ ਜਾਖੜ ਦਾ ਧਰਮ ਉਨ੍ਹਾਂ ਅਤੇ ਮੁੱਖ ਮੰਤਰੀ ਦੀ ਕੁਰਸੀ ਵਿਚਕਾਰ ਅੜਿੱਕਾ ਬਣਿਆ, ਤਾਂ ਉਸ ਵਿਵਾਦ ਨੇ ਕਾਂਗਰਸ ਵਿੱਚ ਹਿੰਦੂਆਂ ਦੀ ਨਿਆਂਪੂਰਨ ਨੁਮਾਇੰਦਗੀ ਬਾਰੇ ਇੱਕ ਅਸਹਿਜ ਸਵਾਲ ਛੱਡ ਦਿੱਤਾ ਸੀ। ਹੁਣ ਸਿੰਗਲਾ ਮੋਹਰੀ ਦਾਅਵੇਦਾਰ ਸਨ, ਪਰ ਪ੍ਰਗਟ ਦੀ ਚੋਣ ਉਸ ਧਾਰਨਾ ਅਤੇ ਰੋਸ ਨੂੰ ਮੁੜ ਜਗਾ ਸਕਦੀ ਹੈ। ਹਿੰਦੂ ਆਗੂਆਂ ਨੂੰ ਦਿਸਣਯੋਗ ਅਧਿਕਾਰ ਚਾਹੀਦਾ ਹੈ, ਨਾਲ ਹੀ ਕਾਰੋਬਾਰ, ਰੁਜ਼ਗਾਰ, ਅਮਨ-ਕਾਨੂੰਨ ਅਤੇ ਜਨਤਕ ਸੁਰੱਖਿਆ ਬਾਰੇ ਇੱਕ ਭਰੋਸੇਯੋਗ ਸ਼ਹਿਰੀ ਏਜੰਡਾ ਵੀ।
ਅਨੁਸੂਚਿਤ ਜਾਤੀ ਦੀ ਹਮਾਇਤ ਲਈ ਲੜਾਈ
ਅਨੁਸੂਚਿਤ ਜਾਤੀ ਦਾ ਵੋਟ ਆਧਾਰ, ਜੋ ਪੰਜਾਬ ਦੀ ਆਬਾਦੀ ਦਾ ਲਗਭਗ ਇੱਕ-ਤਿਹਾਈ ਹੈ ਅਤੇ ਕਿਸੇ ਸਮੇਂ ਕਾਂਗਰਸ ਦੀ ਰੀੜ੍ਹ ਦੀ ਹੱਡੀ ਸੀ, ਨੂੰ ਹਲਕੇ ਵਿੱਚ ਨਹੀਂ ਲਿਆ ਜਾ ਸਕਦਾ। ਕਾਂਗਰਸ ਦੀ ਇਹ ਰਵਾਇਤੀ ਹਮਾਇਤ 2022 ਵਿੱਚ ਪਹਿਲਾਂ ਹੀ ਖੁਰ ਚੁੱਕੀ ਸੀ। ‘ਆਪ’ ਦੀਆਂ ਮੁਫ਼ਤ ਸਹੂਲਤਾਂ, ਯੋਗ ਔਰਤਾਂ ਲਈ ਮਹੀਨਾਵਾਰ 1,000 ਰੁਪਏ ਦੀ ਸਹਾਇਤਾ, ਜੋ ਅਨੁਸੂਚਿਤ ਜਾਤੀ ਦੀਆਂ ਲਾਭਪਾਤਰੀਆਂ ਲਈ ਵਧ ਕੇ 1,500 ਰੁਪਏ ਹੋ ਜਾਂਦੀ ਹੈ, ਅਤੇ ਮਹੀਨੇ ਦੀਆਂ 300 ਯੂਨਿਟ ਮੁਫ਼ਤ ਬਿਜਲੀ ਆਮ ਪਰਿਵਾਰ ਨੂੰ ਚੰਗੀ ਰਾਹਤ ਦਿੰਦੀਆਂ ਹਨ। ਨਾਲ ਹੀ, ਭਾਜਪਾ ਰਵਿਦਾਸੀਆ ਭਾਈਚਾਰੇ ਅਤੇ ਡੇਰਾ ਸੱਚਖੰਡ ਬੱਲਾਂ ਤੱਕ ਆਪਣੀ ਪਹੁੰਚ ਵਧਾਉਣ ਲਈ ਪੂਰਾ ਜ਼ੋਰ ਲਾ ਰਹੀ ਹੈ। ਇਸ ਖੇਤਰ ਵਿੱਚ ਕਾਂਗਰਸ ਨੂੰ ਮਾਣ-ਸਨਮਾਨ, ਸਿੱਖਿਆ, ਨੌਕਰੀਆਂ ਅਤੇ ਹੱਕਾਂ ਬਾਰੇ ਲਗਾਤਾਰ ਸੰਪਰਕ ਦੀ ਲੋੜ ਹੈ। ਇਕੱਲੀ ਚੰਨੀ ਦੀ ਅਹਿਮੀਅਤ ਕਾਫ਼ੀ ਨਹੀਂ ਹੈ।
ਚੋਣ ਫੰਡ ਅਤੇ ਸਿਆਸੀ ਪ੍ਰਭਾਵ
ਪੈਸੇ ਦੇ ਵਸੀਲੇ ਪ੍ਰਗਟ ਲਈ ਇੱਕ ਹੋਰ ਪਰਖ ਹੋਣਗੇ। ਬੂਥ ਪੱਧਰ ਦੀ ਜਥੇਬੰਦੀ, ਰੈਲੀਆਂ, ਰਣਨੀਤੀਕਾਰ, ਸਫ਼ਰ, ਪ੍ਰਚਾਰ ਅਤੇ ਡਿਜੀਟਲ ਮੁਹਿੰਮ ਲਈ ਵੱਡੇ ਫੰਡਾਂ ਦੀ ਲੋੜ ਪੈਂਦੀ ਹੈ। ਉਨ੍ਹਾਂ ਨੂੰ ਚੋਣ ਮੁਹਿੰਮ ਲਈ ਚੋਖੇ ਯੋਗਦਾਨ ਇਕੱਠੇ ਕਰਨੇ ਪੈਣਗੇ। ਕੁਝ ਅਮੀਰ ਆਗੂਆਂ, ਸਿੰਡੀਕੇਟਾਂ ਅਤੇ ਮਾਫ਼ੀਆ ‘ਤੇ ਨਿਰਭਰਤਾ ਤਬਾਹਕੁੰਨ ਸਾਬਤ ਹੋ ਸਕਦੀ ਹੈ ਅਤੇ ਇੱਕ ਸਾਫ਼-ਸੁਥਰੇ ਸਿਆਸਤਦਾਨ ਵਜੋਂ ਉਨ੍ਹਾਂ ਦੇ ਅਕਸ ਨੂੰ ਖੋਰਾ ਲਾਵੇਗੀ।
ਬਾਗ਼ੀਆਂ ਦਾ ਖ਼ਤਰਾ
ਬਾਗ਼ੀ ਇੱਕ ਹੋਰ ਖ਼ਤਰਾ ਹਨ। ਵੜਿੰਗ ਵੱਲੋਂ 60-70 ਨੌਜਵਾਨ ਚਿਹਰਿਆਂ ਨੂੰ ਅੱਗੇ ਲਿਆਉਣ ਦੇ ਜ਼ੋਰ ਨਾਲ ਚਾਹਵਾਨ ਉਮੀਦਵਾਰਾਂ ਦੀਆਂ ਉਮੀਦਾਂ ਵਧੀਆਂ। ਇਹ ਰਾਹੁਲ ਗਾਂਧੀ ਦੀ ਇੱਛਾ ਅਨੁਸਾਰ ਕੀਤਾ ਗਿਆ, ਜੋ ਚਾਹੁੰਦੇ ਹਨ ਕਿ ਪਾਰਟੀ ਵਿੱਚ ਨਵੇਂ ਅਤੇ ਨੌਜਵਾਨ ਚਿਹਰੇ ਲਿਆਂਦੇ ਜਾਣ। ਇਹੀ ਸਥਾਪਤ ਆਗੂਆਂ ਨਾਲ ਸਭ ਤੋਂ ਵੱਡੇ ਵਿਵਾਦ ਦੀ ਜੜ੍ਹ ਸੀ, ਜੋ ਆਪਣੇ ਪਰਿਵਾਰਾਂ ਤੋਂ ਬਿਨਾਂ ਕਿਸੇ ਹੋਰ ਨਾਲ ਸਿਆਸੀ ਥਾਂ ਸਾਂਝੀ ਨਹੀਂ ਕਰਨਾ ਚਾਹੁੰਦੇ। ਹੁਣ ਜੇ ਸਥਾਪਤ ਆਗੂ ਗੱਲਬਾਤ ਰਾਹੀਂ ਟਿਕਟਾਂ ਲੈ ਜਾਂਦੇ ਹਨ (ਜੋ ਉਹ ਅਖ਼ੀਰ ਲੈ ਹੀ ਜਾਣਗੇ), ਤਾਂ ਨਿਰਾਸ਼ ਚਾਹਵਾਨ, ਜਿਨ੍ਹਾਂ ਨੇ ਆਪਣੇ ਸਿਆਸੀ ਸਫ਼ਰ ਲਈ ਸਮਾਂ ਅਤੇ ਪੈਸਾ ਲਾਇਆ ਹੈ, ਆਜ਼ਾਦ ਤੌਰ ‘ਤੇ ਚੋਣ ਲੜ ਸਕਦੇ ਹਨ ਜਾਂ ਵਿਰੋਧੀ ਪਾਰਟੀਆਂ ਵਿੱਚ ਜਾ ਸਕਦੇ ਹਨ। ਵਿਰੋਧੀ ਪਾਰਟੀਆਂ, ਖ਼ਾਸ ਕਰਕੇ ‘ਆਪ’, ਅਜਿਹੇ ਉਮੀਦਵਾਰਾਂ ਨੂੰ ਹੱਲਾਸ਼ੇਰੀ ਦੇ ਕੇ, ਇੱਥੋਂ ਤੱਕ ਕਿ ਉਨ੍ਹਾਂ ਦੀ ਪਿੱਠ ਠੋਕ ਕੇ, ਲਾਭ ਲੈ ਸਕਦੀਆਂ ਹਨ। ਬਾਗ਼ੀ ਦਾ ਜਿੱਤਣਾ ਜ਼ਰੂਰੀ ਨਹੀਂ: ਕਾਂਗਰਸ ਤੋਂ ਖੋਹੀਆਂ 2,000-5,000 ਵੋਟਾਂ ਵੀ ਕਿਸੇ ਫਸਵੇਂ ਮੁਕਾਬਲੇ ਦਾ ਸਾਰਾ ਗਣਿਤ ਬਦਲ ਸਕਦੀਆਂ ਹਨ। ਪ੍ਰਗਟ ਨੂੰ ਨੌਜਵਾਨ ਅਤੇ ਉਤਸ਼ਾਹੀ ਆਗੂਆਂ ਦੇ ਇਸ ਧੜੇ ਨਾਲ ਸੁਲ੍ਹਾ ਕਰਨੀ ਪਵੇਗੀ।
ਪੰਜਾਬ ਲਈ ਇੱਕ ਭਰੋਸੇਯੋਗ ਖਾਕਾ
ਆਖ਼ਰੀ ਪਰ ਸਭ ਤੋਂ ਅਹਿਮ ਗੱਲ ਇਹ ਹੈ ਕਿ ਪੰਜਾਬ ਨੂੰ ਨਸ਼ਿਆਂ, ਅਮਨ-ਕਾਨੂੰਨ, ਕਿਸਾਨੀ ਸੰਕਟ, ਪਾਣੀ ਅਤੇ ਨੌਜਵਾਨਾਂ ਦੇ ਰੁਜ਼ਗਾਰ ਬਾਰੇ ਇੱਕ ਭਰੋਸੇਯੋਗ ਖਾਕੇ, ਇੱਕ ਦੂਰਦਰਸ਼ੀ ਸੋਚ ਦੀ ਲੋੜ ਹੈ। ਇੱਕ ਯਕੀਨ ਕਰਨਯੋਗ ਚੋਣ ਮੈਨੀਫੈਸਟੋ, ਜਿਸ ਵਿੱਚ ਤਰਜੀਹਾਂ, ਫੰਡ ਅਤੇ ਸਮਾਂ-ਸਾਰਣੀ ਹੋਵੇ।
ਪ੍ਰਗਟ ਦਾ ਸਾਫ਼-ਸੁਥਰਾ ਅਕਸ ਭਰੋਸਾ ਜਿੱਤ ਸਕਦਾ ਹੈ, ਪਰ ਉਨ੍ਹਾਂ ਦੀ ਸਫਲਤਾ ਇੱਕ ਅਨੁਸ਼ਾਸਿਤ ਟੀਮ ਬਣਾਉਣ ‘ਤੇ ਨਿਰਭਰ ਕਰੇਗੀ, ਜੋ ਇਨਾਮਾਂ ਦੀ ਸੌਦੇਬਾਜ਼ੀ ਤੋਂ ਪਹਿਲਾਂ ਜਿੱਤ ਲਈ ਕੰਮ ਕਰੇ।
ਪ੍ਰਗਟ ਦਾ ਸਭ ਤੋਂ ਔਖਾ ਮੈਚ ਪੰਜਾਬ: 2027 ਦੇ ਸਿਆਸੀ ਐਸਟ੍ਰੋਟਰਫ਼ ‘ਤੇ ਅਜੇ ਅੱਗੇ ਹੈ।
