ਇੰਗਲੈਂਡ ਵਿੱਚ “Saini Community UK” ਦਾ ਗਠਨ — ਲੰਡਨ ਦੀ ਧਰਤੀ ‘ਤੇ ਸੈਣੀ ਸਮਾਜ ਨੇ ਪੈਰ ਪਸਾਰੇ
ਰਾਕੇਸ਼ ਸੈਣੀ ਅਤੇ ਮੁਨੀਸ਼ ਸੈਣੀ ਦੀ ਅਗਵਾਈ ਹੇਠ ਬਣੀ ਸੰਸਥਾ
ਮਹਾਰਾਜਾ ਸ਼ੂਰ ਸੈਣੀ ਨੂੰ ਸ਼ਰਧਾਂਜਲੀ ਅਤੇ ਫੂਲੇ ਜਯੰਤੀ ਦਾ ਲੰਡਨ ਵਿੱਚ ਪਹਿਲੀ ਵਾਰ ਆਯੋਜਨ
ਲੰਡਨ, 11 ਅਪ੍ਰੈਲ 2026 ( ਮੰਨਨ ਸੈਣੀ)। ਆਲ ਇੰਡੀਆ ਸੈਣੀ ਸੇਵਾ ਸਮਾਜ (ਰਜਿ.) ਦੀ ਪ੍ਰੇਰਨਾ ਸਦਕਾ ਸੋਮਵਾਰ ਨੂੰ ਇੰਗਲੈਂਡ ਵਿੱਚ ਸੈਣੀ ਭਾਈਚਾਰੇ ਦੀ ਨਵੀਂ ਸੰਸਥਾ “Saini Community UK” ਦਾ ਰਸਮੀ ਗਠਨ ਕੀਤਾ ਗਿਆ। ਸੰਸਥਾ ਦੀ ਸਥਾਪਨਾ ਸ਼੍ਰੀ ਰਾਕੇਸ਼ ਸੈਣੀ ਦੀ ਅਣਥੱਕ ਮਿਹਨਤ ਅਤੇ ਪਹਿਲਕਦਮੀ ਸਦਕਾ ਸੰਭਵ ਹੋਈ, ਜਿਨ੍ਹਾਂ ਨੂੰ ਸੰਸਥਾ ਦਾ ਕੋਆਰਡੀਨੇਟਰ ਨਿਯੁਕਤ ਕੀਤਾ ਗਿਆ ਹੈ।
ਸੰਸਥਾ ਦੀ ਸਥਾਪਨਾ ਦੇ ਮੌਕੇ ‘ਤੇ ਸਾਊਥਾਲ ਸਥਿਤ ਸ਼੍ਰੀ ਰਾਮ ਮੰਦਿਰ ਵਿੱਚ ਇੱਕ ਵਿਸ਼ੇਸ਼ ਸਮਾਗਮ ਦਾ ਆਯੋਜਨ ਕੀਤਾ ਗਿਆ, ਜਿਸ ਵਿੱਚ ਮਹਾਰਾਜਾ ਸ਼ੂਰ ਸੈਣੀ ਨੂੰ ਸ਼ਰਧਾਂਜਲੀ ਭੇਂਟ ਕੀਤੀ ਗਈ ਅਤੇ ਮਹਾਤਮਾ ਜੋਤੀਬਾ ਫੂਲੇ ਦੀ 200ਵੀਂ ਜਯੰਤੀ ਮਨਾਈ ਗਈ। ਲੰਡਨ ਵਿੱਚ ਇਸ ਤਰ੍ਹਾਂ ਦਾ ਇਹ ਪਹਿਲਾ ਆਯੋਜਨ ਸੀ। ਸਮਾਗਮ ਵਿੱਚ ਪੂਜਾ, ਹਵਨ ਅਤੇ ਭੰਡਾਰੇ ਦਾ ਵੀ ਆਯੋਜਨ ਕੀਤਾ ਗਿਆ।
ਸਮਾਗਮ ਦੀ ਸਫਲਤਾ ਵਿੱਚ ਪੰਡਿਤ ਸੰਦੀਪ ਅਤੇ ਗੋਪਾਲ, ਰਾਕੇਸ਼ ਸੈਣੀ, ਮਨੀਸ਼ ਸੈਣੀ, ਸੰਤੋਖ ਸੈਣੀ, ਨਰੇਸ਼ ਸੈਣੀ, ਸ਼ਿਵ ਸੈਣੀ, ਨੀਲਮ ਤੇ ਰਜਨੀ ਸੈਣੀ, ਸੰਜੀਵ ਸੈਣੀ, ਅਮਿਤ ਸੈਣੀ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਦਾ ਅਹਿਮ ਯੋਗਦਾਨ ਰਿਹਾ।
ਸਮਾਗਮ ਵਿੱਚ ਆਲ ਇੰਡੀਆ ਸੈਣੀ ਸੇਵਾ ਸਮਾਜ ਦੇ ਪੰਜਾਬ ਸਟੇਟ ਪ੍ਰਧਾਨ ਸ਼੍ਰੀ ਲਵਲੀਨ ਸਿੰਘ ਸੈਣੀ ਅਤੇ ਕੁਰੂਕਸ਼ੇਤਰ (ਹਰਿਆਣਾ) ਦੇ ਪ੍ਰਧਾਨ ਸ਼੍ਰੀ ਨਵਨੀਤ ਸੈਣੀ ਨੇ ਵੀਡੀਓ ਕਾਨਫਰੰਸ ਰਾਹੀਂ ਵਿਸ਼ੇਸ਼ ਸ਼ਿਰਕਤ ਕੀਤੀ। ਇਸੇ ਤਰ੍ਹਾਂ ਰਾਸ਼ਟਰੀ ਪ੍ਰਧਾਨ ਸ਼੍ਰੀ ਦਿਲਬਾਗ ਸਿੰਘ ਸੈਣੀ ਨੇ ਵੀ ਆਨਲਾਈਨ ਪੂਜਾ ਵਿੱਚ ਭਾਗ ਲੈ ਕੇ ਆਪਣੀਆਂ ਸ਼ੁੱਭ ਕਾਮਨਾਵਾਂ ਦਿੱਤੀਆਂ।
ਪੰਜਾਬ ਪ੍ਰਧਾਨ ਸ਼੍ਰੀ ਲਵਲੀਨ ਸਿੰਘ ਸੈਣੀ ਨੇ ਆਨਲਾਈਨ ਪੂਜਾ ਵਿੱਚ ਸ਼ਾਮਲ ਹੁੰਦਿਆਂ Saini Community UK ਦੇ ਗਠਨ ਨੂੰ ਇਤਿਹਾਸਕ ਕਦਮ ਦੱਸਿਆ ਅਤੇ ਪੂਰਨ ਸਹਿਯੋਗ ਦਾ ਭਰੋਸਾ ਦਿੱਤਾ। ਉਨ੍ਹਾਂ ਕਿਹਾ ਕਿ ਇਹ ਸੰਸਥਾ ਵਿਦੇਸ਼ੀ ਧਰਤੀ ‘ਤੇ ਸੱਭਿਆਚਾਰਕ ਵਿਰਸੇ ਦੀ ਸੰਭਾਲ, ਆਪਸੀ ਏਕਤਾ ਅਤੇ ਸੇਵਾ ਦੀਆਂ ਕਦਰਾਂ-ਕੀਮਤਾਂ ਨੂੰ ਸਰਹੱਦਾਂ ਤੋਂ ਪਾਰ ਲੈ ਜਾਣ ਦੇ ਸੰਕਲਪ ਦਾ ਜਿਉਂਦਾ-ਜਾਗਦਾ ਪ੍ਰਮਾਣ ਹੈ।
ਇਸ ਮੌਕੇ ‘ਤੇ ਆਯੋਜਕ ਸ਼੍ਰੀ ਰਾਕੇਸ਼ ਸੈਣੀ ਨੇ ਆਪਣੀ ਸਮੁੱਚੀ ਟੀਮ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ ਅਤੇ ਭਵਿੱਖ ਵਿੱਚ ਵੀ ਅਜਿਹੇ ਆਯੋਜਨ ਕਰਦੇ ਰਹਿਣ ਦਾ ਭਰੋਸਾ ਦਿੱਤਾ।
