ਗੁਰਦਾਸਪੁਰ ਦੇ ਕ੍ਰੇਡਲ ਪੁਆਇੰਟ (ਪੰਘੂੜਾ) ਅੰਦਰ ਕੋਈ ਛੱਡ ਗਿਆ ਚਾਰ ਦਿਨਾਂ ਦਾ ਨਵਜਾਤ ਬੱਚਾ
ਗਣੇਸ਼ ਅਸ਼ਟਮੀ ਦੇ ਪਵਿੱਤਰ ਦਿਹਾੜੇ ਦੇ ਮੌਕੇ ‘ਪਹੁੰਚੇ ਨਵਜਾਤ ਬੱਚੇ ਦਾ ਨਾਮ ਰੱਖਿਆ “ਗਣੇਸ਼”
ਗੁਰਦਾਸਪੁਰ, 27 ਅਗਸਤ 2025 (ਮੰਨਨ ਸੈਣੀ)। ਦਿਲ ਨੂੰ ਛੂਹਣ ਵਾਲਾ ਅਤੇ ਮਨੁੱਖਤਾ ਨਾਲ ਭਰਿਆ ਇਕ ਮੰਜ਼ਰ ਬੁੱਧਵਾਰ ਸ਼ਾਮ ਗੁਰਦਾਸਪੁਰ ਵਿੱਚ ਵੇਖਣ ਨੂੰ ਮਿਲਿਆ, ਜਦੋਂ ਜ਼ਿਲ੍ਹਾ ਬਾਲ ਕਲਿਆਣ ਕੌਂਸਲ (ਡੀ.ਸੀ.ਡਬਲਯੂ.ਸੀ.), ਬਾਲ ਭਵਨ ਤਹਿਤ ਬਣਾਏ ਗਏ ਕ੍ਰੇਡਲ ਪੁਆਇੰਟ (ਪੰਘੂੜਾ) ਨੇ ਇਕ ਨਵਜਨਮੇ ਬੱਚੇ ਦੀ ਜ਼ਿੰਦਗੀ ਬਚਾ ਲਈ। ਇਹ ਕ੍ਰੇਡਲ ਪੁਆਇੰਟ ਕਿਲਕਾਰੀ ਯੋਜਨਾ ਤਹਿਤ 2 ਮਈ 2023 ਨੂੰ ਤਤਕਾਲੀਨ ਡਿਪਟੀ ਕਮਿਸ਼ਨਰ ਡਾ. ਹਿਮਾਂਸ਼ੂ ਅਗਰਵਾਲ (ਆਈ.ਏ.ਐਸ.) ਦੀ ਸੋਚ ਅਤੇ ਦੂਰਦਰਸ਼ੀ ਨੇਤ੍ਰਿਤਵ ਹੇਠ ਸ਼ੁਰੂ ਕੀਤਾ ਗਿਆ ਸੀ। ਇਸ ਦਾ ਮਕਸਦ ਛੱਡੇ ਗਏ ਬੱਚਿਆਂ ਨੂੰ ਇਕ ਸੁਰੱਖਿਅਤ ਝੋਲੀ ਪ੍ਰਦਾਨ ਕਰਕੇ ਉਹਨਾਂ ਦੀ ਜ਼ਿੰਦਗੀ ਬਚਾਉਣੀ ਹੈ। ਅੱਜ ਦੀ ਇਹ ਘਟਨਾ ਇਸ ਯੋਜਨਾ ਦੀ ਕਾਮਯਾਬੀ ਦੀ ਜੀਤੀ-ਜਾਗਦੀ ਮਿਸਾਲ ਹੈ।
ਇਸ ਸੰਬੰਧੀ ਜਾਣਕਾਰੀ ਦਿੰਦੇ ਹੋਏ ਜ਼ਿਲ੍ਹਾ ਬਾਲ ਕਲਿਆਣ ਕੌਂਸਲ ਦੇ ਆਨਰੇਰੀ ਸਕੱਤਰ ਤੇ ਰਾਸ਼ਟਰੀ ਅਵਾਰਡ ਨਾਲ ਸਨਮਾਨਿਤ ਸ਼੍ਰੀ ਰੋਮੇਸ਼ ਮਹਾਜਨ ਨੇ ਦੱਸਿਆ ਕਿ ਬੁਧਵਾਰ ਸ਼ਾਮ ਕਰੀਬ 5:30 ਵਜੇ, ਇਕ ਚਾਰ ਦਿਨਾਂ ਦਾ ਨਵਜਨਮਾ ਬੱਚਾ (ਲੜਕਾ) ਗੁਮਨਾਮ ਢੰਗ ਨਾਲ ਕੋਈ ਪੰਘੂੜੇ ਅੰਦਰ ਰੱਖ ਗਿਆ। ਸਚੇਤ ਸਟਾਫ਼ ਨੇ ਤੁਰੰਤ ਅਧਿਕਾਰੀਆਂ ਨੂੰ ਸੂਚਿਤ ਕੀਤਾ ਤੇ ਬੱਚੇ ਨੂੰ ਸਿਵਲ ਹਸਪਤਾਲ ਗੁਰਦਾਸਪੁਰ ਪਹੁੰਚਾਇਆ ਗਿਆ। ਸਿਵਲ ਸਰਜਨ ਦੀ ਦੇਖ-ਰੇਖ ਹੇਠ ਉਸ ਨੂੰ ਸਮੇਂ ਸਿਰ ਮੈਡੀਕਲ ਸਹਾਇਤਾ ਦਿੱਤੀ ਗਈ।
ਸਿਵਲ ਹਸਪਤਾਲ ਵਿੱਚ ਬੱਚੇ ਦੀ ਦੇਖਭਾਲ ਦੀ ਨਿਗਰਾਨੀ ਕਰਨ ਵਾਲਿਆਂ ਵਿੱਚ ਡਾ. ਅਰਵਿੰਦ ਮਹਾਜਨ (ਐਸ.ਐਮ.ਓ.), ਸ਼੍ਰੀ ਰਤਨ ਲਾਲ (ਮੈਂਬਰ, ਸੀ.ਡਬਲਯੂ.ਸੀ.), ਸ਼੍ਰੀ ਸੁਨੀਲ ਜੋਸ਼ੀ (ਚਾਈਲਡ ਪ੍ਰੋਟੈਕਸ਼ਨ ਅਫ਼ਸਰ), ਬਖ਼ਸ਼ੀ ਰਾਜ (ਕੋਆਰਡੀਨੇਟਰ, ਡੀ.ਸੀ.ਡਬਲਯੂ.ਸੀ.), ਡਾ. ਆਸ਼ਿਅਨ ਸਿੰਘ (ਮੈਡੀਕਲ ਅਫ਼ਸਰ), ਦਿਲਬਾਗ ਸਿੰਘ ਚੀਮਾ (ਸੋਸ਼ਲ ਲਾਈਫ ਮੈਂਬਰ, ਡੀ.ਸੀ.ਡਬਲਯੂ.ਸੀ. ਪੰਜਾਬ), ਦੀਰਜ (ਸੋਸ਼ਲ ਵਰਕਰ, ਡੀ.ਸੀ.ਪੀ.ਯੂ.), ਅਤੇ ਮਿਸਟਰ ਟਵਿੰਕਲ (ਵਲੰਟੀਅਰ) ਸ਼ਾਮਲ ਸਨ।
ਆਨਰੇਰੀ ਸਕੱਤਰ ਰੋਮੇਸ਼ ਮਹਾਜਨ ਨੇ ਦੱਸਿਆ ਕਿ ਗਣੇਸ਼ ਅਸ਼ਟਮੀ ਦੇ ਪਵਿੱਤਰ ਦਿਹਾੜੇ ਦੇ ਮੌਕੇ ‘ਪਹੁੰਚੇ ਇਸ ਨਵਜਾਤ ਬੱਚੇ ਦਾ ਨਾਮ “ਗਣੇਸ਼” ਰੱਖਿਆ ਗਿਆ ਹੈ। ਇਹ ਨਾਮ ਇਕ ਨਵੀਂ ਸ਼ੁਰੂਆਤ, ਰੱਬੀ ਸੁਰੱਖਿਆ ਅਤੇ ਆਸ ਦਾ ਪ੍ਰਤੀਕ ਬਣਿਆ।
ਇਸ ਮੌਕੇ ਸ਼੍ਰੀ ਰੋਮੇਸ਼ ਮਹਾਜਨ ਨੇ ਜਨਤਕ ਐਲਾਨ ਕਰਦਿਆਂ ਕਿਹਾ ਕਿ ਉਹ ਬੇਬੀ ਗਣੇਸ਼ ਦੀ ਪਾਲਣਾ-ਪੋਸ਼ਣਾ ਤੇ ਪੜ੍ਹਾਈ ਦੇ ਸਾਰੇ ਖ਼ਰਚੇ ਨਿੱਜੀ ਤੌਰ ‘ਤੇ ਆਪਣੇ ਜ਼ਿੰਮੇ ਲੈਣਗੇ, ਤਾਂ ਜੋ ਇਸ ਬੱਚੇ ਨੂੰ ਵਧੀਆ ਦੇਖਭਾਲ ਅਤੇ ਉੱਚੇ ਮੌਕਿਆਂ ਦੀ ਕਮੀ ਨਾ ਰਹੇ।
ਜ਼ਿਲ੍ਹਾ ਬਾਲ ਕਲਿਆਣ ਕੌਂਸਲ ਨੇ ਇਸ ਜੀਵਨ-ਬਚਾਉਣ ਵਾਲੇ ਯਤਨ ਵਿੱਚ ਸਾਥ ਦੇਣ ਵਾਲਿਆਂ ਸਭ ਦਾ ਦਿਲੋਂ ਧੰਨਵਾਦ ਕੀਤਾ ਹੈ। ਇਹ ਘਟਨਾ ਸਮਾਜਕ ਸਹਿਯੋਗ ਅਤੇ ਸਮੂਹਕ ਦਿਲਦਾਰੀ ਦੀ ਤਾਕਤ ਨੂੰ ਉਜਾਗਰ ਕਰਦੀ ਹੈ, ਜਿਸ ਨਾਲ ਸਭ ਤੋਂ ਨਾਜ਼ੁਕ ਜੀਵਨ ਵੀ ਸੁਰੱਖਿਅਤ ਬਣ ਸਕਦੇ ਹਨ।
