ਆਪਣੀ ਜਾਣਕਾਰੀ ਆਪ ਭਰ ਕੇ ਬਣੋ ਜਨਗਣਨਾ ਪ੍ਰਕਿਰਿਆ ਦਾ ਹਿੱਸਾ, ਸਰਕਾਰ ਵੱਲੋਂ ਆਸਾਨ ਤਰੀਕਾ ਉਪਲਬਧ
ਗੁਰਦਾਸਪੁਰ, 30 ਅਪ੍ਰੈਲ 2026 (ਮੰਨਨ ਸੈਣੀ)। ਪੰਜਾਬ ਅੰਦਰ ਅੱਜ ਤੋਂ ਸਵ-ਜਨਗਣਨਾ ਪ੍ਰਕਿਰਿਆ ਦੀ ਅਧਿਕਾਰਕ ਸ਼ੁਰੂਆਤ ਹੋ ਗਈ ਹੈ। ਇਸ ਨਵੇਂ ਉਪਰਾਲੇ ਤਹਿਤ ਹੁਣ ਰਾਜ ਦੇ ਲੋਕ ਆਪਣੀ ਅਤੇ ਆਪਣੇ ਪਰਿਵਾਰ ਦੀ ਜਾਣਕਾਰੀ ਖੁਦ ਆਨਲਾਈਨ ਭਰ ਸਕਣਗੇ, ਜਿਸ ਨਾਲ ਜਨਗਣਨਾ ਦੀ ਪ੍ਰਕਿਰਿਆ ਹੋਰ ਤੇਜ਼ ਅਤੇ ਪਾਰਦਰਸ਼ੀ ਬਣੇਗੀ।
ਇਸ ਸੰਬੰਧੀ ਇੱਕ ਜਾਣਕਾਰੀਪਰਕ ਵੀਡੀਓ ਵੀ ਜਾਰੀ ਕੀਤੀ ਗਈ ਹੈ, ਜਿਸ ਵਿੱਚ ਕਦਮ ਦਰ ਕਦਮ ਦੱਸਿਆ ਗਿਆ ਹੈ ਕਿ ਮੋਬਾਈਲ ਜਾਂ ਕੰਪਿਊਟਰ ਰਾਹੀਂ ਸਵ-ਜਨਗਣਨਾ ਕਿਵੇਂ ਕੀਤੀ ਜਾ ਸਕਦੀ ਹੈ। ਵੀਡੀਓ ਵਿੱਚ ਰਜਿਸਟ੍ਰੇਸ਼ਨ, ਲੌਗਇਨ, ਫਾਰਮ ਭਰਨ ਅਤੇ ਸਬਮਿਟ ਕਰਨ ਤੱਕ ਦੀ ਪੂਰੀ ਪ੍ਰਕਿਰਿਆ ਸੌਖੇ ਢੰਗ ਨਾਲ ਸਮਝਾਈ ਗਈ ਹੈ।
ਅਧਿਕਾਰੀਆਂ ਮੁਤਾਬਕ, ਇਸ ਤਰੀਕੇ ਨਾਲ ਲੋਕਾਂ ਦਾ ਸਮਾਂ ਬਚੇਗਾ ਅਤੇ ਇਕੱਠੇ ਕੀਤੇ ਜਾਣ ਵਾਲੇ ਡਾਟਾ ਦੀ ਸਹੀਤਾ ਵੀ ਵਧੇਗੀ। ਜਿਹੜੇ ਲੋਕ ਡਿਜ਼ਿਟਲ ਸਹੂਲਤਾਂ ਦੀ ਵਰਤੋਂ ਕਰ ਸਕਦੇ ਹਨ, ਉਹ ਘਰ ਬੈਠੇ ਹੀ ਇਹ ਪ੍ਰਕਿਰਿਆ ਪੂਰੀ ਕਰ ਸਕਣਗੇ, ਜਦਕਿ ਹੋਰਾਂ ਲਈ ਮੈਦਾਨੀ ਕਰਮਚਾਰੀ ਪਹਿਲਾਂ ਵਾਂਗ ਮਦਦ ਲਈ ਉਪਲਬਧ ਰਹਿਣਗੇ।
ਸਰਕਾਰ ਵੱਲੋਂ ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਵੱਧ ਤੋਂ ਵੱਧ ਇਸ ਸਹੂਲਤ ਦਾ ਲਾਭ ਲਿਆ ਜਾਵੇ ਅਤੇ ਸਹੀ ਜਾਣਕਾਰੀ ਦੇ ਕੇ ਜਨਗਣਨਾ ਪ੍ਰਕਿਰਿਆ ਨੂੰ ਕਾਮਯਾਬ ਬਣਾਇਆ ਜਾਵੇ।
