ਪਠਾਨਕੋਟ ਹਵਾਈ ਅੱਡੇ ਤੋਂ ਉਡਾਣਾਂ ਬਹਾਲ ਕਰਨ ਦੀ ਕਵਾਇਦ ਜਾਰੀ — ਪਰ ਰਾਹ ਅਜੇ ਲੰਮੀ ਹੈ
ਉਡਾਨ 5.4 ਵਿੱਚ ਰੂਟ ਪੇਸ਼, ਜੈਟਵਿੰਗਜ਼ ਦਾ ਪ੍ਰਸਤਾਵ ਅਜੇ ਬਾਕੀ; ਲੋਕ ਸਭਾ ਵਿੱਚ ਉੱਠਿਆ ਸਵਾਲ
ਗੁਰਦਾਸਪੁਰ, 24 ਮਾਰਚ 2026 (ਮੰਨਣ ਸੈਣੀ)। ਲੋਕ ਸਭਾ ਹਲਕਾ ਗੁਰਦਾਸਪੁਰ ਅਧੀਨ ਪੈਂਦੇ ਪਠਾਨਕੋਟ ਹਵਾਈ ਅੱਡੇ ਤੋਂ ਉਡਾਣ ਸੇਵਾ ਬਹਾਲ ਕਰਨ ਦੀ ਦਿਸ਼ਾ ਵਿੱਚ ਕੇਂਦਰ ਸਰਕਾਰ ਦੇ ਯਤਨ ਜਾਰੀ ਹਨ, ਪਰ ਜ਼ਮੀਨੀ ਹਕੀਕਤ ਇਹ ਹੈ ਕਿ ਇਸ ਹਵਾਈ ਅੱਡੇ ਤੋਂ ਹੁਣ ਤੱਕ ਕੋਈ ਉਡਾਣ ਸ਼ੁਰੂ ਨਹੀਂ ਹੋ ਸਕੀ। ਇਹ ਸਥਿਤੀ ਉਦੋਂ ਸਾਹਮਣੇ ਆਈ ਜਦੋਂ ਲੋਕ ਸਭਾ ਵਿੱਚ ਇਸ ਮੁੱਦੇ ਉੱਤੇ ਸਿੱਧਾ ਸਵਾਲ ਪੁੱਛਿਆ ਗਿਆ ਅਤੇ ਸਰਕਾਰ ਨੂੰ ਸੰਸਦ ਦੇ ਪਟਲ ‘ਤੇ ਜਵਾਬ ਦੇਣਾ ਪਿਆ।
ਕਾਂਗਰਸ ਦੇ ਸੰਸਦ ਮੈਂਬਰ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਅਣਤਾਰੇ ਪ੍ਰਸ਼ਨ ਰਾਹੀਂ ਕੇਂਦਰ ਸਰਕਾਰ ਤੋਂ ਇਹ ਪੁੱਛਿਆ ਗਿਆ ਕਿ ਪਠਾਨਕੋਟ ਹਵਾਈ ਅੱਡੇ ਦੀ ਮੌਜੂਦਾ ਸਥਿਤੀ ਕੀ ਹੈ ਅਤੇ ਕੀ ਸਰਕਾਰ ਇੱਥੋਂ ਉਡਾਣਾਂ ਸ਼ੁਰੂ ਕਰਨ ਦੀ ਯੋਜਨਾ ਰੱਖਦੀ ਹੈ। ਕੇਂਦਰੀ ਨਾਗਰਿਕ ਹਵਾਬਾਜ਼ੀ ਰਾਜ ਮੰਤਰੀ ਮੁਰਲੀਧਰ ਮੋਹੋਲ ਨੇ ਸਦਨ ਵਿੱਚ ਦਿੱਤੇ ਆਪਣੇ ਜਵਾਬ ਵਿੱਚ ਪੂਰੀ ਸਥਿਤੀ ਸਪੱਸ਼ਟ ਕੀਤੀ।
ਮੰਤਰੀ ਨੇ ਦੱਸਿਆ ਕਿ ਪਠਾਨਕੋਟ ਹਵਾਈ ਅੱਡੇ ਨੂੰ ਉਡਾਨ ਯੋਜਨਾ ਤਹਿਤ ਪਹਿਲਾਂ ਵੀ ਸੰਚਾਲਿਤ ਕੀਤਾ ਜਾ ਚੁੱਕਾ ਹੈ। ਐਲਾਇੰਸ ਏਅਰ ਨੇ ਦਿੱਲੀ-ਪਠਾਨਕੋਟ ਰੂਟ ‘ਤੇ ਤਿੰਨ ਸਾਲ ਤੱਕ ਉਡਾਣਾਂ ਭਰੀਆਂ ਅਤੇ ਇਸ ਦੌਰਾਨ ਸਥਾਨਕ ਯਾਤਰੀਆਂ ਨੂੰ ਸਿੱਧੀ ਹਵਾਈ ਸੇਵਾ ਦਾ ਲਾਭ ਮਿਲਿਆ। ਇਹ ਤਜਰਬਾ ਇਸ ਗੱਲ ਦਾ ਸਬੂਤ ਹੈ ਕਿ ਪਠਾਨਕੋਟ ਵਿੱਚ ਹਵਾਈ ਯਾਤਰਾ ਦੀ ਮੰਗ ਅਸਲ ਹੈ ਅਤੇ ਇੱਥੇ ਉਡਾਣ ਸੇਵਾ ਵਿਹਾਰਕ ਤੌਰ ‘ਤੇ ਸੰਭਵ ਵੀ ਹੈ। ਵਿਵਹਾਰਕਤਾ ਖੱਡ ਫੰਡਿੰਗ ਦੀ ਤੈਅ ਮਿਆਦ ਮੁੱਕਣ ਤੋਂ ਬਾਅਦ ਉਡਾਣਾਂ ਬੰਦ ਹੋ ਗਈਆਂ। ਇਸ ਤੋਂ ਬਾਅਦ ਸਰਕਾਰ ਨੇ ਇਸ ਰੂਟ ਨੂੰ ਉਡਾਨ ਯੋਜਨਾ ਦੇ 5.4 ਦੌਰ ਵਿੱਚ ਦੁਬਾਰਾ ਬੋਲੀ ਲਈ ਪੇਸ਼ ਕੀਤਾ, ਜੋ ਇਹ ਦਰਸਾਉਂਦਾ ਹੈ ਕਿ ਸਰਕਾਰ ਇਸ ਖੇਤਰ ਵਿੱਚ ਹਵਾਈ ਸੰਪਰਕ ਨੂੰ ਲੈ ਕੇ ਗੰਭੀਰ ਹੈ।
ਹੁਣ ਕਿੱਥੇ ਖੜ੍ਹਾ ਹੈ ਮਾਮਲਾ
ਜੈਟਵਿੰਗਜ਼ ਏਅਰਵੇਜ਼ ਨੇ ਇਸ ਰੂਟ ‘ਤੇ ਬੋਲੀ ਲਗਾਈ ਹੈ ਅਤੇ ਇਹ ਇੱਕ ਸਕਾਰਾਤਮਕ ਸੰਕੇਤ ਹੈ ਕਿ ਨਿੱਜੀ ਖੇਤਰ ਵੀ ਪਠਾਨਕੋਟ ਦੀਆਂ ਹਵਾਈ ਸੰਭਾਵਨਾਵਾਂ ਵਿੱਚ ਦਿਲਚਸਪੀ ਰੱਖਦਾ ਹੈ। ਹਾਲਾਂਕਿ ਹੁਣ ਤੱਕ ਇਸ ਏਅਰਲਾਈਨ ਵੱਲੋਂ ਕੋਈ ਠੋਸ ਪ੍ਰਸਤਾਵ ਸਰਕਾਰ ਨੂੰ ਨਹੀਂ ਮਿਲਿਆ, ਜਿਸ ਕਾਰਨ ਉਡਾਣ ਸੇਵਾ ਸ਼ੁਰੂ ਹੋਣ ਵਿੱਚ ਦੇਰੀ ਹੋ ਰਹੀ ਹੈ। ਮੰਤਰੀ ਦੇ ਜਵਾਬ ਤੋਂ ਸਪੱਸ਼ਟ ਹੈ ਕਿ ਸਰਕਾਰ ਇਸ ਪ੍ਰਕਿਰਿਆ ‘ਤੇ ਨਜ਼ਰ ਬਣਾਈ ਹੋਈ ਹੈ ਅਤੇ ਰੂਟ ਨੂੰ ਲੈ ਕੇ ਸੰਵਾਦ ਜਾਰੀ ਹੈ।
ਦੱਸਣਯੋਗ ਹੈ ਕਿ ਪਠਾਨਕੋਟ ਦੀ ਭੂਗੋਲਿਕ ਅਤੇ ਸਾਮਰਿਕ ਸਥਿਤੀ ਇਸ ਨੂੰ ਹਵਾਈ ਸੰਪਰਕ ਦੇ ਲਿਹਾਜ਼ ਨਾਲ ਖਾਸ ਤੌਰ ‘ਤੇ ਮਹੱਤਵਪੂਰਨ ਬਣਾਉਂਦੀ ਹੈ। ਇਹ ਜ਼ਿਲ੍ਹਾ ਪੰਜਾਬ, ਹਿਮਾਚਲ ਪ੍ਰਦੇਸ਼ ਅਤੇ ਜੰਮੂ-ਕਸ਼ਮੀਰ ਦੀਆਂ ਸੀਮਾਵਾਂ ਦੇ ਸੰਗਮ ‘ਤੇ ਸਥਿਤ ਹੈ। ਇੱਥੇ ਦੇਸ਼ ਦੀ ਮਹੱਤਵਪੂਰਨ ਫ਼ੌਜੀ ਛਾਉਣੀ ਹੈ, ਸੈਰ-ਸਪਾਟੇ ਦੀਆਂ ਵਿਆਪਕ ਸੰਭਾਵਨਾਵਾਂ ਹਨ ਅਤੇ ਸਰਹੱਦੀ ਵਪਾਰ ਦੀ ਸਰਗਰਮੀ ਹੈ। ਸਥਾਨਕ ਵਸਨੀਕਾਂ ਅਤੇ ਵਪਾਰੀਆਂ ਨੂੰ ਹੁਣ ਹਵਾਈ ਯਾਤਰਾ ਲਈ ਅੰਮ੍ਰਿਤਸਰ ਜਾਂ ਜੰਮੂ ਹਵਾਈ ਅੱਡੇ ‘ਤੇ ਨਿਰਭਰ ਰਹਿਣਾ ਪੈਂਦਾ ਹੈ, ਜੋ ਨਾ ਕੇਵਲ ਸਮੇਂ ਸਗੋਂ ਸਾਧਨਾਂ ਦੀ ਵੀ ਬਰਬਾਦੀ ਹੈ।
ਇਸ ਵਿੱਚ ਇਹ ਵੀ ਗੌਰਤਲਬ ਹੈ ਕਿ ਉਡਾਨ ਯੋਜਨਾ (ਉੱਡੇ ਦੇਸ਼ ਕਾ ਆਮ ਨਾਗਰਿਕ) ਦਾ ਉਦੇਸ਼ ਦੇਸ਼ ਦੇ ਛੋਟੇ ਅਤੇ ਸਰਹੱਦੀ ਸ਼ਹਿਰਾਂ ਨੂੰ ਕਿਫ਼ਾਇਤੀ ਹਵਾਈ ਸੇਵਾਵਾਂ ਨਾਲ ਜੋੜਨਾ ਹੈ ਅਤੇ ਪਠਾਨਕੋਟ ਇਸ ਉਦੇਸ਼ ਲਈ ਇੱਕਦਮ ਸਟੀਕ ਉਦਾਹਰਨ ਹੈ। ਲੋੜ ਇਸ ਗੱਲ ਦੀ ਹੈ ਕਿ ਜੈਟਵਿੰਗਜ਼ ਏਅਰਵੇਜ਼ ਜਲਦ ਤੋਂ ਜਲਦ ਆਪਣਾ ਪ੍ਰਸਤਾਵ ਸਰਕਾਰ ਨੂੰ ਸੌਂਪੇ ਅਤੇ ਰਸਮੀ ਪ੍ਰਕਿਰਿਆ ਅੱਗੇ ਵਧੇ। ਸਰਕਾਰ ਵੱਲੋਂ ਵੀ ਇਹ ਉਮੀਦ ਕੀਤੀ ਜਾਂਦੀ ਹੈ ਕਿ ਉਹ ਇਸ ਪ੍ਰਕਿਰਿਆ ਵਿੱਚ ਤੇਜ਼ੀ ਲਿਆਵੇ ਤਾਂ ਜੋ ਪਠਾਨਕੋਟ ਦੇ ਲੋਕਾਂ ਨੂੰ ਉਹ ਹਵਾਈ ਸਹੂਲਤ ਮਿਲ ਸਕੇ ਜਿਸ ਦੇ ਉਹ ਅਸਲ ਹੱਕਦਾਰ ਹਨ। ਫਿਲਹਾਲ ਉਮੀਦ ਬਰਕਰਾਰ ਹੈ — ਅਤੇ ਉਮੀਦ ਹੈ ਕਿ ਇਹ ਉਮੀਦ ਜਲਦ ਹਕੀਕਤ ਬਣੇਗੀ।
