ਗੁਰਦਾਸਪੁਰ, 29 ਮਈ 2025 (ਦੀ ਪੰਜਾਬ ਵਾਇਰ)। ਸਰਦਾਰ ਬੇਅੰਤ ਸਿੰਘ ਸਟੇਟ ਯੂਨੀਵਰਸਿਟੀ, ਗੁਰਦਾਸਪੁਰ (ਜੋ ਪਹਿਲਾਂ ਬੇਅੰਤ ਇੰਜੀਨੀਅਰਿੰਗ ਕਾਲਜ) ਵਿੱਚ 29 ਮਈ ਨੂੰ ਇੱਕ ਗੰਭੀਰ ਤੇ ਸੰਵੈਦਨਸ਼ੀਲ ਮਾਹੌਲ ਵਿੱਚ ਸੇਵਾ ਨਿਵ੍ਰਿੱਤੀ ਸਮਾਰੋਹ ਮਨਾਇਆ ਗਿਆ।
ਇਸ ਸਮਾਰੋਹ ਰਾਹੀਂ ਤਿੰਨ ਸਤਿਕਾਰਯੋਗ ਅਧਿਕਾਰੀਆਂ ਨੂੰ ਉਨ੍ਹਾਂ ਦੀ ਲੰਬੀ, ਨਿਭੇਦਾਰੀ ਅਤੇ ਇਮਾਨਦਾਰ ਸੇਵਾਵਾਂ ਲਈ ਇੱਜ਼ਤ ਸਨਮਾਨ ਦੇ ਕੇ ਵਿਦਾ ਕੀਤਾ ਗਿਆ। ਸੇਵਾ ਨਿਵ੍ਰਿੱਤ ਹੋਣ ਵਾਲੇ ਕਰਮਚਾਰੀਆਂ ਅੰਦਰ ਡਾ. ਓਮ ਪਾਲ ਸਿੰਘ, ਪ੍ਰੋਫੈਸਰ, ਮਕੈਨੀਕਲ ਇੰਜੀਨੀਅਰਿੰਗ ਵਿਭਾਗ, ਸ਼੍ਰੀ ਸੁਰਿੰਦਰ ਸਿੰਘ, ਫੋਰਮੈਨ ਇਨਸਟਰਕਟਰ ਅਤੇ ਸ਼੍ਰੀ ਗੁਰਨਾਮ ਸਿੰਘ, ਫੋਰਮੈਨ ਇਨਸਟਰਕਟਰ ਸ਼ਾਮਿਲ ਸਨ।
ਇਸ ਮੌਕੇ ਉਪਕੁਲਪਤੀ ਡਾ. ਐਸ.ਕੇ. ਮਿਸ਼ਰਾ ਨੇ ਸੰਬੋਧਨ ਕਰਦਿਆਂ ਆਖਿਆ ਕਿ,
ਯੂਨੀਵਰਸਿਟੀ ਉਨ੍ਹਾਂ ਦੀਆਂ ਸੇਵਾਵਾਂ ਨੂੰ ਸਦਾ ਯਾਦ ਰੱਖੇਗੀ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਉਹ ਹਮੇਸ਼ਾਂ ਯੂਨੀਵਰਸਿਟੀ ਪਰਿਵਾਰ ਦੇ ਅਟੁੱਟ ਹਿੱਸਾ ਰਹਿਣਗੇ ਅਤੇ ਉਨ੍ਹਾਂ ਦਾ ਸਦਾ ਸਵਾਗਤ ਕੀਤਾ ਜਾਵੇਗਾ।
ਇਸ ਵਿਸ਼ੇਸ਼ ਸਮਾਰੋਹ ਵਿੱਚ ਡਾ. ਆਰ.ਕੇ. ਅਵਸਥੀ, ਡਾ. ਰਣਜੀਤ ਸਿੰਘ, ਡਾ. ਹਰਿਸ਼ ਪੁੰਗੋਤਰਾ, ਡਾ. ਅਰਵਿੰਦ ਸ਼ਰਮਾ, ਅਤੇ ਰਜਿਸਟ੍ਰਾਰ ਡਾ. ਅਜੈ ਮਹਾਜਨ ਸਮੇਤ ਕਈ ਵਿਦਵਾਨਾਂ ਨੇ ਸ਼ਿਰਕਤ ਕੀਤੀ ਅਤੇ ਆਪਣੇ ਵਿਚਾਰ ਸਾਂਝੇ ਕਰਦਿਆਂ ਸੇਵਾ ਨਿਵ੍ਰਿੱਤ ਹੋ ਰਹੇ ਅਧਿਕਾਰੀਆਂ ਦੀ ਮਿਹਨਤ, ਸਮਰਪਣ ਅਤੇ ਸਧੀ ਹੋਈ ਜੀਵਨ ਰੀਤ ਦੀ ਖੁਲ ਕੇ ਤਾਰੀਫ਼ ਕੀਤੀ।
ਸੇਵਾ ਨਿਵ੍ਰਿੱਤ ਹੋਏ ਅਧਿਕਾਰੀਆਂ ਨੇ ਵੀ ਮੰਚ ‘ਤੇ ਪਹੁੰਚ ਕੇ ਭਾਵੁਕ ਅੰਦਾਜ਼ ‘ਚ ਆਪਣੇ ਸੇਵਾ ਸਮੇਂ ਦੀਆਂ ਯਾਦਾਂ ਸਾਂਝੀਆਂ ਕੀਤੀਆਂ ਅਤੇ ਸੰਸਥਾ ਵੱਲੋਂ ਮਿਲੀ ਇੱਜ਼ਤ ਲਈ ਧੰਨਵਾਦ ਜਤਾਇਆ। ਉਨ੍ਹਾਂ ਨੇ ਕਿਹਾ ਕਿ ਜਦ ਵੀ ਯੂਨੀਵਰਸਿਟੀ ਨੂੰ ਲੋੜ ਹੋਵੇਗੀ, ਉਹ ਆਪਣੀ ਸੇਵਾ ਦੇਣ ਲਈ ਹਮੇਸ਼ਾਂ ਤਿਆਰ ਰਹਿਣਗੇ। ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੀ ਹਾਜ਼ਰੀ ਨੇ ਸਮਾਰੋਹ ਨੂੰ ਹੋਰ ਵੀ ਸ਼ਾਨਦਾਰ ਬਣਾ ਦਿੱਤਾ।
ਸਮਾਰੋਹ ਦਾ ਸਮਾਪਨ ਡਾ. ਰਣਜੀਤ ਸਿੰਘ ਵੱਲੋਂ ਧੰਨਵਾਦ ਪ੍ਰਸਤਾਵ ਰਾਹੀਂ ਹੋਇਆ, ਜਿਸ ਵਿੱਚ ਉਨ੍ਹਾਂ ਨੇ ਸੇਵਾ ਨਿਵ੍ਰਿੱਤ ਕਰਮਚਾਰੀਆਂ ਦੇ ਨਿਰੰਤਰ ਯੋਗਦਾਨ ਦੀ ਸਾਰਾਹਨਾ ਕੀਤੀ ਅਤੇ ਹਾਜ਼ਰੀਨ, ਵਿਦਵਾਨਾਂ ਤੇ ਪਰਿਵਾਰਕ ਮੈਂਬਰਾਂ ਦਾ ਤਹਿ ਦਿਲੋਂ ਸ਼ੁਕਰੀਆ ਕੀਤਾ।
