ਜਿਨ੍ਹਾਂ ਅਪਣਾਈ ਉਨ੍ਹਾਂ ਨੂੰ ਮਿਲੀ ਘਰ ਬੈਠੇ ਸੇਵਾ, ਡੀਸੀ ਆਦਿੱਤਿਆ ਉੱਪਲ ਬੋਲੇ — ਜਾਗਰੂਕਤਾ ਫੈਲਾਵਾਂਗੇ, ਹਰ ਕੇਂਦਰ ‘ਤੇ ਲਾਵਾਂਗੇ ਸੂਚੀ
ਗੁਰਦਾਸਪੁਰ, 6 ਅਪ੍ਰੈਲ 2026 (ਮੰਨਨ ਸੈਣੀ)। ਆਰਟੀਓ ਦਫ਼ਤਰ ਦੇ ਨੇੜੇ ਸੇਵਾ ਕੇਂਦਰ ਦੇ ਬਾਹਰ ਸੋਮਵਾਰ ਦੀ ਸਵੇਰ ਇੱਕ ਵੱਖਰੀ ਹੀ ਤਸਵੀਰ ਸੀ। ਦਫ਼ਤਰ ਖੁੱਲ੍ਹੇ ਵੀ ਨਹੀਂ ਸੀ ਕਿ ਸਵੇਰੇ ਸੱਤ ਵਜੇ ਹੀ ਦਰਵਾਜ਼ੇ ਅੱਗੇ ਕਤਾਰ ਲੱਗ ਚੁੱਕੀ ਸੀ। ਜਦੋਂ ਅਜੇ ਤਾਲੇ ਵੀ ਨਹੀਂ ਖੁੱਲ੍ਹੇ ਸੀ, ਔਰਤਾਂ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਹੱਥਾਂ ਵਿੱਚ ਕਾਗਜ਼ਾਤ ਫੜੀ ਆਪਣੀ ਜਗ੍ਹਾ ਬਣਾਉਣ ਵਿੱਚ ਜੁੱਟੇ ਹੋਏ ਸਨ। ਕਿਸੇ ਕੋਲ ਆਧਾਰ ਕਾਰਡ ਸੀ, ਕਿਸੇ ਕੋਲ ਰਾਸ਼ਨ ਕਾਰਡ ਦੀ ਫ਼ੋਟੋਕਾਪੀ — ਮਕਸਦ ਇੱਕੋ ਸੀ: ਅਨੁਸੂਚਿਤ ਜਾਤੀ ਸਰਟੀਫ਼ਿਕੇਟ ਅਤੇ ਮੁੱਖ ਮੰਤਰੀ ਸਿਹਤ ਬੀਮਾ ਕਾਰਡ, ਕੁਝ ਹੋਰ ਸੁਧਾਰਾਂ ਲਈ ਆਏ ਸਨ।
ਮੁੱਖ ਮੰਤਰੀ ਭਗਵੰਤ ਮਾਨ ਸਰਕਾਰ ਨੇ ਅਨੁਸੂਚਿਤ ਜਾਤੀ ਵਰਗ ਦੀਆਂ ਔਰਤਾਂ ਨੂੰ 1500 ਰੁਪਏ ਮਹੀਨਾਵਾਰ ਸਹਾਇਤਾ ਦੇਣ ਦਾ ਐਲਾਨ ਕੀਤਾ ਹੈ, ਜਿਸ ਦੀ ਅਧਿਸੂਚਨਾ ਜਾਰੀ ਹੋ ਚੁੱਕੀ ਹੈ। ਇਸ ਯੋਜਨਾ ਦਾ ਲਾਭ ਲੈਣ ਲਈ ਜਾਤੀ ਸਰਟੀਫ਼ਿਕੇਟ ਲਾਜ਼ਮੀ ਹੈ ਅਤੇ ਇਸੇ ਇੱਕ ਕਾਗਜ਼ ਲਈ ਸਵੇਰ ਤੋਂ ਲੋਕਾਂ ਦੀ ਭੀੜ ਦਫ਼ਤਰਾਂ ਵੱਲ ਉਮੜ ਪਈ। ਨਾਲ ਹੀ ਮੁੱਖ ਮੰਤਰੀ ਸਿਹਤ ਬੀਮਾ ਯੋਜਨਾ ਤਹਿਤ ਸਿਹਤ ਕਾਰਡ ਬਣਵਾਉਣ ਵਾਲਿਆਂ ਦੀ ਭੀੜ ਨੇ ਦਬਾਅ ਹੋਰ ਵਧਾ ਦਿੱਤਾ — ਇੱਕੋ ਖਿੜਕੀ, ਕਈ ਕੰਮ ਅਤੇ ਘੰਟਿਆਂ ਦੀ ਉਡੀਕ।
ਪੰਛੀ ਕਾਲੋਨੀ ਦੇ ਗੁਰਦਿੱਤ ਆਪਣੀ ਪਤਨੀ ਅਤੇ ਪਰਿਵਾਰ ਦੀਆਂ ਤਿੰਨ ਔਰਤਾਂ ਨਾਲ ਆਏ ਸਨ। ਬੋਲੇ, “ਡਰ ਸੀ ਕਿ ਦੇਰ ਨਾਲ ਆਏ ਤਾਂ ਨੰਬਰ ਨਹੀਂ ਮਿਲੇਗਾ, ਇਸ ਲਈ ਸੂਰਜ ਚੜ੍ਹਨ ਤੋਂ ਪਹਿਲਾਂ ਹੀ ਨਿਕਲ ਪਏ।” ਸੰਗਪੁਰਾ ਰੋਡ ਦੀ ਰਾਮ ਪਿਆਰੀ ਨੇ ਸਿੱਧਾ ਸਵਾਲ ਦਾਗਿਆ, “ਸਰਕਾਰ ਪੈਸੇ ਦੇਣਾ ਚਾਹੁੰਦੀ ਹੈ ਤਾਂ ਸਰਟੀਫ਼ਿਕੇਟ ਲਈ ਏਨੇ ਗੇੜੇ ਕਿਉਂ?” ਰਛਪਾਲ ਸਿੰਘ ਆਪਣੀ ਮਾਂ ਲਈ ਸਿਹਤ ਕਾਰਡ ਬਣਵਾਉਣ ਆਏ ਸਨ। ਜਦੋਂ ਇਨ੍ਹਾਂ ਸਭ ਤੋਂ ਪੁੱਛਿਆ ਗਿਆ ਕਿ ਇਹੀ ਕੰਮ ਘਰ ਬੈਠੇ ਇੱਕ ਫ਼ੋਨ ਕਾਲ ‘ਤੇ ਵੀ ਹੋ ਸਕਦਾ ਹੈ, ਤਾਂ ਸਭ ਦਾ ਇੱਕੋ ਜਵਾਬ ਸੀ — ਜਾਣਕਾਰੀ ਹੀ ਨਹੀਂ ਸੀ। ਇਹ ਗੱਲ ਮਹਿਜ਼ ਇੱਕ ਬੰਦੇ ਦੀ ਨਹੀਂ, ਉਸ ਪੂਰੀ ਕਤਾਰ ਦੀ ਸੀ।
ਉੱਧਰ ਇਸੇ ਸ਼ਹਿਰ ਵਿੱਚ ਕੁਝ ਲੋਕ ਅਜਿਹੇ ਵੀ ਸਨ ਜਿਨ੍ਹਾਂ ਨੇ ਨਾ ਕਤਾਰ ਦੇਖੀ, ਨਾ ਧੁੱਪ ਵਿੱਚ ਘੰਟੇ ਬਰਬਾਦ ਕੀਤੇ। ਰਾਕੇਸ਼ ਕੁਮਾਰ, ਰਾਮ ਦਾਸ ਅਤੇ ਗੁਰਦਿਆਲ ਨੇ ਪੰਜਾਬ ਸਰਕਾਰ ਦੀ 1076 ਹੈਲਪਲਾਈਨ ਰਾਹੀਂ ਘਰ ਬੈਠੇ ਹੀ ਪ੍ਰਮਾਣ ਪੱਤਰ ਹਾਸਲ ਕਰ ਲਏ। ਰਾਕੇਸ਼ ਕੁਮਾਰ ਨੇ ਦੱਸਿਆ, “1076 ‘ਤੇ ਕਾਲ ਕੀਤੀ, ਲੋੜੀਂਦੀ ਜਾਣਕਾਰੀ ਦਿੱਤੀ ਅਤੇ ਕੁਝ ਦਿਨਾਂ ਵਿੱਚ ਕੰਮ ਹੋ ਗਿਆ — ਨਾ ਲਾਈਨ, ਨਾ ਭੱਜ-ਦੌੜ।” ਰਾਮ ਦਾਸ ਦਾ ਕਹਿਣਾ ਸੀ ਕਿ ਇਸ ਇੱਕ ਕਾਲ ਨੇ ਉਨ੍ਹਾਂ ਦੇ ਅੱਧੇ ਦਿਨ ਦੀ ਬੱਚਤ ਕਰ ਦਿੱਤੀ। ਗੁਰਦਿਆਲ ਨੇ ਕਿਹਾ, “ਪਹਿਲਾਂ ਪਤਾ ਹੁੰਦਾ ਤਾਂ ਪਿਛਲੀ ਵਾਰ ਵੀ ਇਹੀ ਰਾਹ ਅਪਣਾਉਂਦੇ। ਸਰਕਾਰ ਨੂੰ ਇਹ ਨੰਬਰ ਹਰ ਘਰ ਤੱਕ ਪਹੁੰਚਾਉਣਾ ਚਾਹੀਦਾ ਹੈ।” ਤਿੰਨਾਂ ਦੀ ਰਾਏ ਇੱਕੋ ਸੀ — 1076 ਨੇ ਸਮਾਂ ਵੀ ਬਚਾਇਆ ਅਤੇ ਭੀੜ ਦੀ ਮੁਸੀਬਤ ਤੋਂ ਵੀ ਬਚਾਇਆ।
ਇਸ ਪੂਰੇ ਮਾਮਲੇ ‘ਤੇ ਜਦੋਂ ਗੁਰਦਾਸਪੁਰ ਦੇ ਡਿਪਟੀ ਕਮਿਸ਼ਨਰ ਆਦਿੱਤਿਆ ਉੱਪਲ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਭਰੋਸਾ ਦਿੱਤਾ ਕਿ 1076 ਹੈਲਪਲਾਈਨ ਅਤੇ ਹੋਰ ਡਿਜੀਟਲ ਸੇਵਾਵਾਂ ਬਾਰੇ ਜਾਗਰੂਕਤਾ ਫੈਲਾਈ ਜਾਵੇਗੀ। ਉਨ੍ਹਾਂ ਦੱਸਿਆ ਕਿ ਹਰ ਸੇਵਾ ਕੇਂਦਰ ਦੇ ਬਾਹਰ ਨੇੜਲੇ ਹੋਰ ਕੇਂਦਰਾਂ ਅਤੇ ਸੀਐੱਸਸੀ ਸੈਂਟਰਾਂ ਦੀ ਸੂਚੀ ਵੀ ਲਾਈ ਜਾਵੇਗੀ, ਤਾਂ ਜੋ ਲੋਕਾਂ ਨੂੰ ਬੇਲੋੜੀ ਪਰੇਸ਼ਾਨੀ ਨਾ ਝੱਲਣੀ ਪਵੇ। ਡੀਸੀ ਉੱਪਲ ਨੇ ਇਹ ਵੀ ਦੱਸਿਆ ਕਿ ਮੁੱਖ ਮੰਤਰੀ ਸਿਹਤ ਬੀਮਾ ਯੋਜਨਾ ਤਹਿਤ ਪਿੰਡਾਂ ਅਤੇ ਸ਼ਹਿਰਾਂ ਵਿੱਚ ਵਿਸ਼ੇਸ਼ ਕੈਂਪ ਲਗਾਏ ਜਾ ਰਹੇ ਹਨ, ਜਿਸ ਨਾਲ ਲੋਕਾਂ ਨੂੰ ਘਰ ਦੇ ਨੇੜੇ ਹੀ ਸਹੂਲਤ ਮਿਲ ਸਕੇ।
