ਚੰਡੀਗੜ੍ਹ, 23 ਮਈ 2026 (ਦੀ ਪੰਜਾਬ ਵਾਇਰ)। ਪੰਜਾਬ ਵਿੱਚ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਏ ਡਿਜੀਟਲ ਸੰਗਠਨ ਕਾਕਰੋਚ ਜਨਤਾ ਪਾਰਟੀ (ਸੀਜੇਪੀ) ਦੇ ਨਾਂ ਦੀ ਵਰਤੋਂ ਕਰਕੇ ਸਾਈਬਰ ਠੱਗ ਲੋਕਾਂ ਨੂੰ ਆਪਣਾ ਸ਼ਿਕਾਰ ਬਣਾਉਣ ਲੱਗੇ ਹਨ। ਠੱਗ ਵਟਸਐਪ ਰਾਹੀਂ ਲਿੰਕ ਭੇਜ ਕੇ ਲੋਕਾਂ ਦੇ ਫ਼ੋਨ ਹੈਕ ਕਰ ਰਹੇ ਹਨ ਅਤੇ ਬੈਂਕ ਖਾਤੇ ਖ਼ਾਲੀ ਕਰ ਰਹੇ ਹਨ। ਲੁਧਿਆਣਾ ਪੁਲਿਸ ਨੇ ਇਸ ਨਵੇਂ ਫਰਾਡ ਤੋਂ ਲੋਕਾਂ ਨੂੰ ਸੁਚੇਤ ਕਰਨ ਲਈ ਆਪਣੇ ਸਰਕਾਰੀ ਸੋਸ਼ਲ ਮੀਡੀਆ ਪੇਜ ‘ਤੇ ਵੀਡੀਓ ਜਾਰੀ ਕੀਤੀ ਹੈ।
ਕਿਵੇਂ ਕੰਮ ਕਰਦਾ ਹੈ ਇਹ ਸਕੈਮ
ਪੁਲਿਸ ਅਨੁਸਾਰ ਸਾਈਬਰ ਠੱਗ ਵਟਸਐਪ ‘ਤੇ ਅਜਿਹੇ ਸੁਨੇਹੇ ਭੇਜਦੇ ਹਨ ਜਿਨ੍ਹਾਂ ਵਿੱਚ ਨੌਜਵਾਨਾਂ ਨੂੰ ਭਾਵਨਾਤਮਕ ਤੌਰ ‘ਤੇ ਖਿੱਚਣ ਵਾਲੀਆਂ ਗੱਲਾਂ ਲਿਖੀਆਂ ਹੁੰਦੀਆਂ ਹਨ — ਜਿਵੇਂ ‘ਦੇਸ਼ ਦੀ ਪੁਕਾਰ, ਸਿਸਟਮ ਬਦਲਣ ਦਾ ਵੇਲਾ ਆ ਗਿਆ’ ਅਤੇ ‘ਨੌਜਵਾਨਾਂ ਲਈ ਵੱਡਾ ਮੌਕਾ’। ਸੁਨੇਹੇ ਵਿੱਚ ਸੀਜੇਪੀ ਨਾਲ ਜੁੜਨ ਦੀ ਅਪੀਲ ਕੀਤੀ ਜਾਂਦੀ ਹੈ ਅਤੇ ਨਾਲ ਇੱਕ ਲਿੰਕ ਦਿੱਤਾ ਹੁੰਦਾ ਹੈ।
42 ਸਕਿੰਟ ਦੀ ਵੀਡੀਓ ਵਿੱਚ ਪੁਲਿਸ ਅਧਿਕਾਰੀ ਅਮਰਿੰਦਰ ਸਿੰਘ ਨੇ ਸਪੱਸ਼ਟ ਕੀਤਾ ਕਿ ਇਹ ਲਿੰਕ ਦਰਅਸਲ ਫਿਸ਼ਿੰਗ ਲਿੰਕ ਹੈ। ਜਿਵੇਂ ਹੀ ਕੋਈ ਵਿਅਕਤੀ ਜਜ਼ਬਾਤੀ ਹੋ ਕੇ ਜਾਂ ਉਤਸੁਕਤਾ ਵੱਸ ਇਸ ‘ਤੇ ਕਲਿੱਕ ਕਰਦਾ ਹੈ, ਉਸਦਾ ਮੋਬਾਈਲ ਫ਼ੋਨ ਤੁਰੰਤ ਹੈਕ ਹੋ ਜਾਂਦਾ ਹੈ। ਫ਼ੋਨ ਵਿੱਚ ਮੌਜੂਦ ਸਾਰੀਆਂ ਬੈਂਕਿੰਗ ਵੇਰਵੇ, ਪਾਸਵਰਡ ਅਤੇ ਨਿੱਜੀ ਡੇਟਾ ਸਿੱਧਾ ਠੱਗਾਂ ਕੋਲ ਪਹੁੰਚ ਜਾਂਦਾ ਹੈ। ਇਸ ਡੇਟੇ ਦੀ ਦੁਰਵਰਤੋਂ ਕਰਕੇ ਠੱਗ ਨਾ ਕੇਵਲ ਬੈਂਕ ਖਾਤੇ ਤੋਂ ਪੈਸੇ ਉਡਾ ਲੈਂਦੇ ਹਨ, ਸਗੋਂ ਪੀੜਤ ਦੇ ਨਾਂ ‘ਤੇ ਲੱਖਾਂ ਰੁਪਏ ਦਾ ਕਰਜ਼ਾ ਵੀ ਚੁੱਕ ਸਕਦੇ ਹਨ।
ਪੁਲਿਸ ਦੀ ਅਪੀਲ
ਪੁਲਿਸ ਕਮਿਸ਼ਨਰੇਟ ਲੁਧਿਆਣਾ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਸੋਸ਼ਲ ਮੀਡੀਆ ‘ਤੇ ਚੱਲ ਰਹੇ ਕਿਸੇ ਵੀ ਟਰੈਂਡ ਜਾਂ ਭਾਵਨਾਤਮਕ ਸੁਨੇਹੇ ਦੇ ਵਹਾਅ ਵਿੱਚ ਆ ਕੇ ਅਣਜਾਣ ਲਿੰਕਾਂ ‘ਤੇ ਕਲਿੱਕ ਨਾ ਕਰੋ। ਅਜਿਹੀ ਇੱਕ ਭੁੱਲ ਜ਼ਿੰਦਗੀ ਭਰ ਦੀ ਕਮਾਈ ਮਿੰਟਾਂ ਵਿੱਚ ਸਾਫ਼ ਕਰ ਸਕਦੀ ਹੈ।
ਠੱਗੀ ਹੋਣ ‘ਤੇ ਕੀ ਕਰੋ
ਜੇਕਰ ਅਜਿਹੀ ਕੋਈ ਸਾਈਬਰ ਧੋਖਾਧੜੀ ਹੋ ਜਾਵੇ ਤਾਂ ਘਬਰਾਉਣ ਦੀ ਬਜਾਏ ਤੁਰੰਤ ਸਾਈਬਰ ਹੈਲਪਲਾਈਨ ਨੰਬਰ 1930 ‘ਤੇ ਕਾਲ ਕਰੋ। ਸਮੇਂ ਸਿਰ ਸ਼ਿਕਾਇਤ ਦਰਜ ਕਰਾਉਣ ਨਾਲ ਬੈਂਕ ਖਾਤੇ ਤੋਂ ਗਏ ਪੈਸੇ ਹੋਲਡ ਕਰਵਾ ਕੇ ਵਾਪਸ ਮਿਲਣ ਦੀ ਸੰਭਾਵਨਾ ਵੱਧ ਜਾਂਦੀ ਹੈ।
